कृष्णनगरको कर्फ्यू ६ घण्टालाई हट्याे

कपिलवस्तु- दुर्गा भवानीको मूर्ति सेलाउने क्रममा विवाद भएपछि कपिलवस्तुको कृष्णनगरमा लगाइएको कर्फ्यु छ घण्टाका लागि हटाइएको छ । सर्वसाधरणलाई किनमेलका लागि भन्दै प्रशासनले बिहान ६ बजेदेखि मध्यान्ह १२ बजे सम्मका लागि कर्फ्यु हटाइएको हो । 

सीमा बजार कृष्णनगरमा मंगलबार बिहानबाट कर्फ्यू हटाइएसंगै सर्वाधरणको चहलपहल बढेको छ भने सडकमा सुरक्षाकर्मीको बाक्लो उपस्थिती रहेको छ । जिल्ला सुरक्षा समितिको बैठक पुनः बसेर सुरक्षा अवस्थाबारे विश्लेषण गर्दै कर्फ्यु थप गर्ने वा खोल्ने भन्ने विषयमा निर्णय हुने जिल्ला प्रहरी कार्यालय कपिलवस्तुका प्रवत्ता तथा डिएसपी रवी रावलले जानकारी दिए । 

तीन दिनसम्म पटकपटकको छलफल र संवादपछि पनि तनाव साम्य नभए पछि अर्को आदेश नभएसम्मका लागि भन्दै जिल्ला प्रशासन कार्यालयले आइतबार कर्फ्यु जारी गरेको थियो । प्रहरीले आइतबार नै मूर्ति विर्सजन गरेको छ । 

शुक्रबार साझ ६ बजेतिर दुर्गा मूर्तिलाई बजार परिक्रमा गरि गोलघर तिर लैजाने क्रममा घरको छतबाट ढुंगा प्रहार गरेपछि विवाद सुरु भएको थियो । यस्तै आइतबार दिउँसो १२ बजेतिर मूर्ति विसर्जन गर्न लैजाने÷नलैजाने पक्षबीच विवाद भएको थियो। विवादले उग्ररुप लिएपछि आइतबार प्रहरीले ६ राउण्ड हवाई फायर गरेको थियो। ३ राउण्ड अश्रु ग्यास फायर गरेको थियो।