कपिलवस्तुमा लागेको कर्फ्यु ४ घण्टालाई खुल्यो

कपिलवस्तु- दुर्गा भवानीको मूर्ति सेलाउने क्रममा कपिलवस्तुको कृष्णनगरमा विवाद भएपछि प्रशासनले लगाएको कर्फ्यु चार घण्टाका लागि स्थगन गरिएको छ । 

सोमबार बिहान बसेको जिल्ला सुरक्षा समितिको बैठकले बिहान ८ बजेदेखि मध्यान्ह १२ बजेसम्म कर्फ्यु हटाउने निर्णय गरेको हो । सोही निर्णयअनुसार अहिले कपिलवस्तुमा कर्फ्यु हटाइएको छ । कर्फ्यु हटेसंगै बजारमा सर्वसाधरणको चहलपहल बढेको छ । 

किनमेलका लागि र सर्वसाधरणलाई अत्याआवाश्यक काम गर्न सहज होस भनेर चार घण्टाका लागि कर्फ्यु हटाइएको जिल्ला प्रहरी कार्यालय कपिलवस्तुका प्रवत्ता तथा डिएसपी रवी रावलले जानकारी दिइ । उनका अनुसार अहिले कपिलवस्तुको अवस्था सामान्य बन्दै गएको छ भने बजार र सडकमा सुरक्षाकर्मीको बाक्लो उपस्थिती छ ।

जिल्ला सुरक्षा समितिको बैठक पुनः बसेर सुरक्षा अवस्थाबारे विश्लेषण गर्दै कर्फ्यु थप गर्ने वा खोल्ने भन्ने विषयमा निर्णय हुने डिएसपी रावलले जानकारी दिए । यस्तै तीन दिनदेखि रोकिएको मूर्ति विर्सजन कार्य कडा सुरक्षाका साथ सम्पन्न गरिएको उनले बताए ।  

तीन दिनसम्म पटकपटकको छलफल र संवादपछि पनि तनाव साम्य नभए पछि अर्को आदेश नभएसम्मका लागि भन्दै जिल्ला प्रशासन कार्यालयले आइतबार कर्फ्यु जारी गरेको थियो । 

शुक्रबार साझ ६ बजेतिर दुर्गा मूर्तिलाई बजार परिक्रमा गरि गोलघर तिर लैजाने क्रममा घरको छतबाट ढुंगा प्रहार गरेपछि विवाद सुरु भएको हो। यस्तै आइतबार दिउँसो १२ बजेतिर मूर्ति विसर्जन गर्न लैजाने÷नलैजाने पक्षबीच विवाद भएको थियो। विवादले उग्ररुप लिएपछि आइतबार प्रहरीले ६ राउण्ड हवाई फायर गरेको थियो। ३ राउण्ड अश्रु ग्यास फायर गरेको थियो।