नवलपरासी बस दुर्घटना अपडेट : मृतकको संख्या ६ पुग्यो

कावासोती- पूर्व पश्चिम राजमार्गअन्तर्गत नवलपरासीको मध्यविन्दु नगरपालिका–११ अरुणखोलामा भएको बस दुर्घटना परि ज्यान गुमाउनेको संख्या ६ पुगेको  छ। 

एक जनाको पुरानो मेडिकल कलेज भरतपुरमा उपचारका क्रममा मृत्यु भएसँगै मृतकको संख्या ६ पुगेको हो । पाँच जनाको घटनास्थलमै मृत्यु भएको थियो । 

उपचारका क्रममा ज्यान गुमाउनेमा गुल्मीको हस्तचौर गाउँपाकिाल २ बस्ने वर्ष ३५ का तिलक विष्ट रहेको प्रहरीले जनाएको छ । उनी नेपाली सेनामा कार्यरत सैनिक रहेको पुष्टि भएको छ । उनी लेटाङ मोरङमा कार्यरत थिए । यस्तै घटना स्थलमै ज्यान गुमाउनेहरुमा सुनसरी घर भइ जिल्ला जनस्वास्थ्य कार्यालय पश्चिम नवलपरासीमा कार्यरत ३२ वर्षीया अब्दुल अन्सारी, मोरङको सुन्दरचौरका ११ वर्षीय सोहन कार्की, भोजपुरका २७ वर्षका रामजीत राई र भारत बिहारका विद्यान्नद यादव रहेका छन् । अर्का एक जना पुरुषको शनाखत हुन नसकेको जिल्ला प्रहरी कार्यालय नवलपरासीले जनाएको छ ।

इटहरीबाट भैरहवाका लागि छुटेको लु१ख ८४ ५४ नंको बस आइतबार बिहान ५ बजेको समयमा आफैँ अनियन्त्रित भई सडकबाट करीब ३५ मिटर तल खसेको थियो ।  बसको बत्ती मधुरो रहेको र गति तीव्र भएका कारण बस दुर्घटनामा परेको यात्रुलाई उद्धृत गर्दै जिल्ला प्रहरी कार्यालय नवलपुरका प्रहरी उपरीक्षक रमेश थापाले जानकारी दिए । दुर्घटनामा परी घाइते भएका ४१  जनाको भरतपुर र नौ जनाको स्थानीय मेडिकलमा उपचार भइरहेको छ । 

४० जना यात्रु बोक्ने क्षमता भएको गाडीले ५२ यात्रु बोकेको प्रहरीको भनाई छ । दसैंमा टिका सकेर आ–आफ्नो गन्तव्यमा हिँडेका यात्रु बसमा खचाखच थिए । बसका चालक निदाएका कारण बिहान बस राजमार्गबाट देब्रेतर्फ पल्टिएर दुर्घटना भएको हो ।