आजका अखबार : वामदेवको रहरले नेकपामा भाँडभैलो

काठमाडौं- राजधानीबाट प्रकाशित बिहीबारका राष्ट्रिय दैनिक अखबारहरुले वामदेव गौतम चुनावमा लड्ने तयारी भएपछि नेकपाभित्र असन्तुष्टि चुलिएको विषयलाई प्राथमिकतामा पारेका छन् । 

गौतमलाई सांसद बनाउनै लागि रामवीर मानन्धरलाई राजीनामा दिन लगाइएको भन्दै उपप्रधानमन्त्री इश्वर पोखरेलले नै चर्को असन्तुष्टि जनाएका छन् । जनताले नरुचाएर पराजीत गरेको ब्यक्तिका लागि उपनिर्वाचन गराएर पुनः संसदमा ल्याउन खोज्नु लज्जाजनक काम भएको भन्दै उनले आपत्ति जनाएका छन् ।

गौतमको विषयलाई लिएर पार्टीमा ठूलो विवाद सृजना भएको छ भने काठमाडौं–७ का स्थानीय नेता कार्यकर्ताले उपनिर्वाचन किन भनेर समेत प्रश्न गरेका छन् । 

यसै विषलाई मुख्य समाचार बनाउँदै आजको कान्तिपुर दैनिकले दुबै अध्यक्षलाई स्थानीय नेताको प्रश्नः उपचुनाव किन ? शीर्षकमा खबर छापेको छ । नागरिक दैनिकले गौतमको रहरले नेकपा शीर्ष तहमै विवाद शीर्षकमा खबर लेखेको छ । अन्नपूर्णले गौतमको इच्छामा पार्टीभित्रै असन्तुष्टि शीर्षकमा खबर प्रकाशित गरेको छ । नयाँ पत्रिकाले काठमाडौं ७ मा उपनिर्वाचन गर्न राज्यको १० करोड शीर्षकमा खबर लेखेको छ । 

यो विषय बाहेक आजको अन्नपूर्णले महँगीको मार शीर्षकमा मुख्य समाचार छापेको छ भने सहन्यायाधिवक्ता पाँच लाख घुससहित पक्राउ गरेको खबर पनि महत्वका साथ प्रकाशित गरेको  छ ।

नागरिक दैनिकले जनकपुर आइपुग्यो ब्रोडगेज रेल शीर्षकमा मुख्य समाचा छापेको छ भने स्थानीय सरकारले प्रदेशलाई टेर्न छाडेको विषयलाई विशेष महत्वका साथ प्रकाशित गरेको छ । 

कान्तिपुरले विभिन्न जातजाति मिलेर नुवाकोटको बेलकोटगढीमा जमरा राख्ने गरेको विषय, क्यालेन्डरबिनै संसद् चल्ने गरेको विषय र मालबाहक रेल जनकपुरमा आएको विषयलाई पहिलो पृष्ठमा छापेको छ । डोजरले मच्चाएको उधुमलाई फलोअप गर्दै आजको नयाँ पत्रिकाले यसै विषयलाई मुख्य समाचार बनाएको छ ।