नेपालले आयोजना गर्दै ओलम्पिक छनोटको खेल 

काठमाडौं– फ्रान्सको पेरिसमा हुने महिला ओलम्पिक फुटबल २०२४ प्रतियोगिताको एसियाली छनोटको पहिलो चरणको खेल नेपालले आयोजना गर्ने भएको छ। 

अखिल नेपाल फुटबल संघ (एन्फा)ले आयोजना गर्ने यो प्रतियोगितामा नेपाल र भियतनामको महिला फुटबल टोलीको सहभागिता रहनेछ।

नेपालको समूहमा अफगानिस्तान र प्यालेस्टाइन रहेका भए पनि दुवैले प्रतियोगिता नखेल्ने भन्दै नाम फिर्ता लिएपछि नेपाल र भियतनामबीच मात्र प्रतिस्पर्धा हुन लागेको हो। 

उक्त समूहको विजेता टोली महिला ओलम्पिक फुटबलको दोस्रो चरणमा पुग्नेछ। एसियाली राष्ट्रलाई विभिन्न सात समूहमा विभाजन गरिएको छ।

प्रत्येक समूहको विजेता टोली दोस्रो चरणमा पुग्नेछ। नेपालमा आयोजना हुने पहिलो चरणको खेल आगामी २२–२५ चैतमा दशरथ रंगशालामा हुनेछ। 

खेल हेर्ने दर्शकका लागि साधारण टिकटको मूल्य प्याराफिटतर्फ ३ सय र भीआईपी प्याराफिटतर्फ १ हजार कायम गरिएको एन्फाले जनाएको छ। प्रतियोगिताका लागि करिब ४३ लाख खर्च लाग्ने आयोजकको भनाइ छ।