काठमाडौं– मुख्यमन्त्री शालिकराम जम्कट्टेलले दोस्रोपल्ट बागमती प्रदेशसभाबाट विश्वासको मत पाएका छन्। शुक्रबार ११० सदस्यीय प्रदेशसभाका ६७ सांसदले मुख्यमन्त्री जम्कट्टेललाई विश्वासको मत दिएका हुन्।
विश्वासको मतको विपक्षमा १७ मत परेको छ भने ७ सांसद तटस्थ बसे। मुख्यमन्त्रीले कम्तीमा ५६ सांसदको समर्थन पाउनुपर्नेमा ६७ सांसदले समर्थन गरेका छन्। जम्कट्टेललाई कांग्रेस, नेकपा एस र हाम्रो नेपाली पार्टीले विश्वासको मत दिएका छन्। मुख्यमन्त्री नियुक्त भएको तीन महिना नपुग्दै उनले दोस्रोपल्ट विश्वासको मत पाएका हुन्।
प्रदेश सरकारमा सहभागी राप्रपाका ३ मन्त्रीहरुले १३ फागुनमा राजीनामा दिएर सरकारको समर्थन फिर्ता लिएका कारण अल्पमतमा परेका जम्कट्टेलले शुक्रबार पुनः विश्वासको मत लिएका हुन्।
२५ पुसमा मुख्यमन्त्रीमा नियुक्त जमकट्टेलले ३ माघमा पहिलोपल्ट विश्वासको मत लिएका थिए। जम्कट्टेललाई एमाले र राप्रपाले विश्वासको मत दिएनन्।
प्रदेशसभामा सबैभन्दा ठूलो दल कांग्रेस जम्कट्टेलको सरकारमा जाने भएको छ। कांग्रेस संसदीय दलका नेता बहादुरसिं लामाले मुख्यमन्त्री जम्कट्टेललाई विश्वासको मत दिने र सरकारमा सहभागी हुने बताएका हुन्।
प्रदेशसभामा कांग्रेसका ३७, एमालेका २७, माओवादी केन्द्रका २१, राप्रपाका १३, नेकपा एकिकृत समाजवादीका ७, नेमकिपाका ३ र हाम्रो नेपाली पार्टीका २ जना सांसद छन्।