सञ्चार तथा सूचना प्रविधिमन्त्री रेखा शर्माले प्रधानमन्त्री पुष्पकमल दाहाल प्रचण्डको भारत भ्रमण वैशाखमा हुने बताएकी छन्। वैशाख दोस्रो साताभित्रै प्रधानमन्त्रीको भारत भ्रमण हुने उनले बताइन्।
‘प्रधानमन्त्रीको विदेश भ्रमण भारतबाट सुरू हुन्छ, भ्रमण वैशाखमा हुन्छ भनेर मैले जानकारी दिइसकेको छु,’ नयाँ दिल्लीमा बिहीबार आयोजित एक कार्यक्रमपछि नेपाली दूतावासमा पत्रकारहरूसँग उनले भनिन्।
साथै उनले इन्टरनेसनल टेलिकम युनियनको क्षेत्रीय कार्यालय उद्घाटनका क्रममा प्राविधिक विषयवस्तुमा छलफल भएको बताइन्। भारत सरकारसँग भएका छलफलमा आफूले सुनौली नाकाबाहेकका अन्य नाका पनि सहज हुने गरी सञ्चालनमा आउनुपर्ने बताएको उनले जानकारी दिइन्।
उनले भारतबाट नेपालमा फोन गर्दा सहुलियत दिन र नेपालीहरूले सिमकार्ड निकाल्दा सहज वातावरण बनाइदिन पनि भारत सरकारसँग आग्रह गरेको बताइन्।