काठमाडौं– ‘पत्रकारहरु बिक्रीमा छन्’ अभिव्यक्ति दिएर विवादमा तानिएका सभामुख देवराज घिमिरेले आफ्नो भनाइ फिर्ता लिएको घोषणा गरेका छन्। ३ चैतमा नेपाल पत्रकार महासंघ अध्यक्ष र पदाधिकारीसँगको भेटमा पत्रकारबारे दिएको टिप्पणीले विवाद निम्तिएपछि सभामुख घिमिरेले मंगलबार अध्यक्ष विपुल पोखरेलसहितलाई भेटेर आफ्नो विवादित भनाइ फिर्ता लिएको बताएका हुन्।
सभामुख घिमिरेले ‘पत्रकारहरू बिक्रीमा छन्’ भन्ने अभिव्यक्ति दिएपछि महासंघले विज्ञप्ति निकालेरै फिर्ता लिन चेतावनी दिएको थियो।
सभामुख घिमिरेले महासंघ पदाधिकारीसँग सोमबार आफूले नियतवश र पत्रकारलाई चोट पु¥याउने उद्देश्यले टिप्पणी नगरेको दाबी गरे।
‘मेरो टिप्पणी त्यस्तो खाले नियतसहित थिएन। पत्रकारलाई चोट दिने हिसाबले भनेको पनि होइन। त्यसलाई दुर्घटनाको रुपमा मात्रै लिनुप¥यो भन्ने सद्भाव सभामुखबाट व्यक्त भयो,’ महासंघका महासचिव रोशन पुरीले भने।