माधव नेपाललाई प्रचण्ड सरकारमा जानेबारे अन्तिम निर्णय लिने जिम्मा

काठमाडौं– नेकपा एसले प्रधानमन्त्री पुष्पकमल दाहाल प्रचण्डको सरकारमा सहभागिता जनाउन अन्तिम निर्णय लिने जिम्मा पार्टी अध्यक्ष माधवकुमार नेपाललाई सुम्पिएको छ।

मंगलबार नेकपा एसको केन्द्रीय सचिवालय बैठकले प्रचण्ड सरकारमा सहभागिता जनाउनबारे अन्तिम निर्णय लिने गरी सुझाव दिन ३ सदस्यीय कार्यदल बनाएको हो। पार्टी अध्यक्ष नेपालको नेतृत्वमा उपाध्यक्ष प्रमेश हमाल र महासचिव घनश्याम भुसाल सदस्य रहेको कार्यदल गठन गरिएको हो।

‘केन्द्र र प्रदेश सरकारका मन्त्रालयको बाँडफाँट एवं सरकारको एजेन्डाबारे बैठकमा छलफल भयो। एउटा मात्रै नभएर धेरै दलसँग छलफल गर्नु भएकाले नेकपा एसको कुन मन्त्रालयमा दाबी रहने भन्ने विषयमा कार्यदलले सुझाव दिनेछ’, पार्टी प्रवक्ता जगन्नाथ खतिवडाले भने। 

संसद्बाट दोस्रो पटक विश्वासको मत लिएपछि प्रधानमन्त्री प्रचण्डले सांसद सिट संख्याका आधारमा मन्त्रालय बाँडफाँट गर्ने प्रारम्भिक प्रस्ताव गठबन्धन दलभित्र राखेका छन्।