गोरखा पुगेर प्रधानमन्त्री प्रचण्डले गरे सडक शिलान्यास

काठमाडौं– प्रधानमन्त्री पुष्पकमल दाहाल प्रचण्डले निर्वाचन क्षेत्र गोरखा पुगेर सडक स्तरोन्नतिको शिलान्यास गरेका छन्।

प्रधानमन्त्री प्रचण्डले मंगलबार पालुङटार नगरपालिकास्थित पन्थहिटी–कटहरे–हर्मी–साहिलटार सडक स्तरोन्नति योजनाको शिलान्यास गरेका हुन्। गोरखा २ मा पर्ने यो क्षेत्रबाट प्रधानमन्त्री प्रचण्ड संघीय सांसद निर्वाचित भएका थिए।

प्रधानमन्त्री प्रचण्डसँगै पूर्वप्रधानमन्त्री डा. बाबुराम भट्टराई, उपप्रधान एवं भौतिक पूर्वाधार तथा यातायातमन्त्री नारायणकाजी श्रेष्ठ, गोरखाबाट निर्वाचित कांग्रेस गण्डकी प्रदेश सांसद सुरेन्द्र पाण्डे पनि गोरखा पुगेका छन्। 

भारतीय एक्जिम बैंकसँगको विकास साझेदारीमा स्तरोन्नति गरिन लागेको सडकको लागत ८० करोड छ।

कार्यक्रममा प्रधानमन्त्री प्रचण्डले विकासलाई गति दिन तीनै तहका सरकारबीच समन्वय बैठक डाक्ने तयारी भइरहेको बताए। उनले भने, ‘विकासलाई गति दिन संघ, प्रदेश र स्थानीय तहबीच समन्वय गर्न बृहत्तर बैठक छिट्टै आयोजना गर्दै छु।’ सडक बनाएर मात्रै विकास र रोजगारी नहुने हँुदा शिक्षा, स्वास्थ्यलगायत क्षेत्रसँग सडक जोड्न सक्नुपर्ने उनको धारणा छ।