अर्थशास्त्रतर्फको नोबेल पुरस्कार दुई अमेरिकी अर्थशास्त्रीलाई

लन्डन- यस वर्षको अर्थशास्त्रतर्फको नोबेल पुरस्कार अर्थशास्त्रीहरू विलियम नोर्डहस र पौल रोमरलाई प्रदान गरिने भएको छ। दिगो विकासको क्षेत्रमा उनीहरूले दिएको योगदानको कदरस्वरूप दुवैलाई संयुक्त रूपमा विश्वको सबैभन्दा प्रतिष्ठित सम्मान दिइने घोषणा भएको हो।

जलवायु परिवर्तन र प्रविधिको विकासबाट अर्थव्यवस्था कसरी प्रभावित हुन्छ भन्ने विषयमा दुवै अमेरिकी अर्थशास्त्रीहरूले शोध गरेका छन्। पुरस्कार घोषणा गर्दै रोयल स्विडिस एकेडेमी अफ साइन्सका अनुसार दिगो विकासको लक्ष्य प्राप्त गर्ने तरिकाबारे उनीहरूले ‘वर्तमान समयका सबैभन्दा महत्वपूर्ण प्रश्नहरू’ शीर्षकको शोध गरेका छन्।


दुवैले ९० लाख स्विडिस क्रोनर अर्थात् १० लाख अमेरिकी डलरको उक्त पुरस्कार बाँडेर लिनेछन्। येल विश्वविद्यालयका प्राध्यापक नोर्डहसले अर्थव्यवस्था र जलवायुबीचको अन्तरक्रियाको वर्णन गर्दै आएका छन्। यस्तै, न्युयोर्क विश्वविद्यालयको स्टर्न स्कुल अप बिजनेसका प्राध्यापक रोमरले आर्थिक सामथ्र्यले कसरी नयाँ विचार र आविष्कारहरू उत्पादनका लागि फर्महरूको इच्छालाई नियन्त्रित गर्छ भन्‍ने प्रयोगात्मक ढंगले देखाएका छन्।