काठमाडौं– उपप्रधान एवं भौतिक पूर्वाधार तथा यातायातमन्त्री नारायणकाजी श्रेष्ठले मुलुकभरका सडकलाई व्यवस्थित बनाउने गरी काम सुरु भइसकेको बताएका छन्। मुलुकभरका सडकमा वर्षैभर यातायातका साधन सञ्चालन गर्ने गरी मन्त्रालयले आवश्यक योजना बनाइरहेको उनको भनाइ छ।
मन्त्री श्रेष्ठले जोरपाटी–मूलपानी, भैंसेपाटी र बालाजु सडकको स्थलगत निरीक्षणका क्रममा सरकार मुलुकभरका सडकलाई व्यवस्थित बनाउने गरी काम भइरहेको बताएका हुन्।
उनले सडक व्यवस्थित बनाउने अभियानअन्तर्गत भैंसेपाटी र बालाजु, जोरपाटी र मूलपानी सडकको स्थलगत निरीक्षण गरिएको र कालोपत्रे हुन बाँकी सडक चाँडै कालोपत्रे गरिने प्रतिबद्धता जनाए। भैंसेपाटी र बालाजु, जोरपाटी र मूलपानी सडक निर्माणमा स्थानीय जग्गा मुआब्जा विवाद, खानेपानी निर्माण र अन्डरग्राउन्ड विद्युत्का कारण समस्या रहेको उनले उल्लेख गरे।
अदालत, अख्तियार, वन मन्त्रालयसँग छुट्टै सडक निर्माणमा रहेका समस्याका विषयमा छिट्टै छलफल गर्ने योजना रहेको मन्त्री श्रेष्ठले जानकारी दिए।
उनले काठमाडौं उपत्यका र उपत्यकाबाहिरका रुग्ण आयोजना निश्चित अवधिभित्र सम्पन्न गर्न आयोजना प्रमुखहरुलाई निर्देशन दिइसकिएको बताए।
उनले भने, ‘सरकारले नयाँ रणनीतिक महत्त्वका राष्ट्रिय राजमार्ग र सडकमा कतिपय ठेक्का भएका छन्। कतिपय ठेक्का हुन बाँकी छन् । ठेक्का भएर पनि काम नभएका आयोजना पनि छन्। सबै काठमाडौं उपत्यका र उपत्यका बाहिरका रुग्ण आयोजना प्रमुखलाई निश्चित अवधिभित्र आयोजना सम्पन्न गर्न निर्देशन दिइएको छ। सोहीअनुसार अनुगमन पनि भएको छ। काममा केही प्रगति भए पनि सन्तुष्ट हुनुपर्ने अवस्था छैन।’
सडक निर्माणमा कतिपय ठेकेदारको लापरबाहीका कारण समयमै सम्पन्न नहुने जग्गा मुआब्जा विवादले सडक कालोपत्रे गर्न नसकिएको उनको दाबी छ।