के छापे आजका राष्ट्रिय दैनिक अखबारहरुले ? 

काठमाडाैं- राजधानीबाट प्रकाशित आइतबारका राष्ट्रिय दैनिक अखबारहरुले  विविध विषयका खबरलाई प्राथमिकतामा पारेका छन् ।
 
चाडपर्वको मुखमा महँगी बढेको विषयलाई आजको नागरिक दैनिकले मुख्य समाचार बनाएको छ भने सुदुरपश्चिमका किशोरी र महिलाहरु आत्मारक्षाका लागि तालिम लिन थालेको विषयलाई विशेष महत्वका साथ छापेको छ ।

धनगढी रंगशालमा भइरहेको अभ्यासमा एक हजार भन्दा बढि किशोरी, युवती र महिलाहरुको सहभागितमा रहेको छ। मुलुकमा दिनप्रतिदिन बढिरहेको बलात्कार तथा महिला हिंसाका घटनालाई लक्षित गरि तालिम सञ्चालन गरिएको समाचारमा उल्लेख छ । 

कान्तिपुर दैनिकले भने संसदीय समिति पिच्छे एउटै विषयमा फरक फरक निर्देशन दिने गरेको विषयलाई प्राथमिकताका साथ छापेको छ । प्रकाशित समाचारअनुसार संसद्मा समितिबीच चर्चामा रहेका इस्युमा कसले पहिला छलफल चलाउने भन्ने होडबाजी देखिएको छ । उनीहरु कार्यक्षेत्र मिचेर सरकारलाई निर्देशन दिइरहेका छन् ।  एउटै विषयमा फरक फरक निर्देशनले कार्यान्व्यन गर्नुपर्ने निकाय रनभुल्लमा परेको समाचारमा उल्लेख छ । 

यस्तै कान्तिपुर जुवाको अखडामा प्रहरी छापा मार्दा भाग्ने क्रममा दुई जनाको मृत्यु भएको विषयलाई पनि विशेष महत्वका साथ छापेको छ । कागेश्वरी मनोहरा ७ स्थित टेन्डु शेर्पाको घरमा छापा मार्न प्रहरी टोली पुग्दा प्रहरीसंग बच्न भाग्ने क्रममा दुई जनाको मृत्यु भएको हो । घरको तेस्रो तलाबाट हामफालेर सरोज घले र सोमलाल तामाङको मृत्यु भएको कान्तिपुरले उल्लेख गरेको छ । 

आजको अन्नपूर्ण पोस्ट्ले पैदल मार्गबाट अमेरिका जाने क्रम अझै नरोकिएको विषयलाई विशेष महत्वका साथ छापेको छ । १२ देखि १६ मुलुक पार गरेर अमेरिका पुग्ने गरेको र प्रतिब्यक्ति ३० देखि ७५ लाख अबैध खर्च हुने गरेको समाचारमा उल्लेख छ । पछिल्लो १५ वर्षमा करिब ४ हजारको बाटोमै मृत्यु भएको अन्नपूर्णले लेखेको छ । 

नयाँ पत्रिकाले भने  स्थानीय ढुकुटीमा डोजरको ज्यादती शीर्षकमा मुख्य समाचार छापेको छ । अधिकांश स्थानीय तहको सबैभन्दा पहिलो प्राथमिकतामा सडक परेका छन् । तर, त्यसको डिजाइन इन्जिनियरले नभइ जोडर अप्रेटरले गर्दा बाटो कमसल त बनेको त छ नै पैसा पनि चाहिने भन्दा बढि सकिरहेको नयाँ पत्रिकाले लेखेको छ।