कक्षा ११ को परीक्षाफल प्रकाशित

काठमाडौं- कक्षा ११ को परीक्षाफल सार्वजनिक भएको छ । राष्ट्रिय परीक्षा बोर्डले शनिबार साँझ परीक्षाफल सार्वजनिक गरेको हो । अक्षंराङ्कन पद्धति (ग्रेडिङ)मा आधारित परीक्षाफल प्रकाशन गरेको बोर्डले जनाएको छ । 

परीक्षामा नियमिततर्फ तीन लाख ३२ हजार आठ सय सय ९१ जना विद्यार्थी सहभागी थिए । त्यस्तै आंशिकतर्फ एक लाख ७६ हजार ४९ र अंक प्रणालीतर्फ ३९ हजार पाँच सय पाँच जना सहभागी रहेको बोर्डले जनाएको छ । 

परीक्षामा सहभागी मध्ये नियमिततर्फ एक हजार एक सय ४५ विद्यार्थीले ३.६१ देखि ४.० जीपीए ल्याएको परीक्षा नियन्त्रक कृष्ण शर्माले जानकारी दिए । शर्माका अनुसार ३.२१ देखि ३.६० जीपीए ल्याउने विद्यार्थीको संख्या आठ हजार नौ सय ४९ छ।

त्यस्तै २४ हजार पाँच सय १५ विद्यार्थीले जीपीए २.८१ देखि जीपीए ३.२० ल्याएका छन् । ४८ हजार ७ सय ३२ जनाले २.४१ देखि २.८० जीपीए प्राप्त गरेको पनि शर्माले बताए ।

२.०१ देखि २.४० जीपीए ल्याउने विद्यार्थीको संख्या ८६ हजार सात सय ७० छ । ९२ हजार ५ सय ९३ परीक्षार्थीले १.६१ देखि २.०० जीपीए पाएका छन्। १.२१ देखि १.६० जीपीए ल्याउने परीक्षार्थीको संख्या ४१ हजार चार सय ६ जना र ०.८१ देखि १.२० जीपीए प्राप्त गर्ने विदार्थीको संख्या आठ हजार एक सय २७ रहेको छ । ०.० देखि ०.८० जीपीए पाउने विद्यार्थीको संख्या २० हजार ६ सय ८५ छ ।

त्यसै गरी आंशिकको अंक पद्धति अन्तगत परीक्षा लेख्ने ३८.८१ प्रतिशत विद्यार्थी उत्तीर्ण भएका छन् । कक्षा ११ को परीक्षा गत वैशाख ३० देखि जेठ ९ गतेसम्म सञ्चालन भएको थियो ।