नक्कली नागरिकता बनाउन खोज्ने तीनजना प्रहरी फन्दामा

जनकपुरधाम- नक्कली नागरिकता बनाउन खोज्ने तीनजनालाई प्रहरीले जनकपुरबाट पक्राउ गरेको छ । पक्राउ पर्नेमा भारतको सीतामढी जिल्ला कोरियाही पञ्चायत भेमुवाका २४ वर्षीय तसिफ अंसारी, जनकपुरधाम–१४ रजौल बस्ने ५५ वर्षीय मन्जुर अंसारी र उनकी श्रीमती ४८ वर्षीया सलमा खातुन रहेको प्रहरीले जनाएको छ ।

पक्राउ परेका सीतामढी कोरियाहीका तसिफ मन्जुरको साला रहेको प्रहरीले जनाएको छ । मन्जुरले आफ्ना साला र श्रीमतीको भाइ नातापर्ने तसिफलाई छोरा भनि नेपाली नागरिकता दिने तयारी गरेका थिए ।

मन्जुर र सलामाले भारतीय नागरिक तसिफको नेपाली नागरिकता बनाउने तयारी गरेको सूचनाको आधारमा प्रहरीले खानतलाशी गरेको थियो । खानतलाशीको क्रममा नागरिकता दिलाउन सम्पूर्ण कागजात तयार अवस्थामा बरामद भएको जिल्ला प्रहरी कार्यालय धनुषाका प्रवक्ता एवं डीएसपी दीपेन्द्र शाहीले जानकारी दिए ।

पक्राउ परेका तीनैजनलाई हिरासतमा राखी यसपूर्व पनि नक्कली नागरिकता बनाउने कार्यमा संलग्न रहे नरहेको बारे आवश्यक अनुसन्धान भइरहेको जिल्ला प्रहरी कार्यालय धनुषाले जनाएको छ ।