नेपाल भारतलाई पराजित गर्दै फाइनल प्रवेश

काठमाडौं- भुटानमा जारी साफ यू-१८ महिला च्याम्पियनसिप अन्तर्गत नेपाल फाइनल प्रवेश गरेको  छ । नेपाली यु-१८  महिला फुटबल  टोलीले शुक्रबार भएको सेमिफाइनल खेलमा भारतलाई टाइब्रेकरमा ३-१ ले पराजित गर्दै फाइनल प्रवेश गरेको हो ।

निर्धारित समयको खेल १-१ को बराबरीमा सकिएपछि खेलको निर्णय टाइब्रेकर धकेलिएको थियो । भुटानको चाङलिमिथाङ रंगशालामा भएको खेलको पहिलो हाफमा नै नेपालले अग्रता  लिएकाने थियो । नेपालका लागि पहिलो हाफमा फरवार्ड रश्मी कुमारी घिसिङले गोल गरेकी थिइन् । उनले रेखा पौडेलको थ्रो पासलाई सदुपयोग गर्दै पेनाल्टी क्षेत्रभित्र बाट सहजै गोल गरेकी हुन् ।

तर, दोस्रो हाफ नेपालले अग्रता जोगाउन सकेन् ।  नेपाल दोस्रो हाफमा एक गोल खादै खेल बराबरीमा आएको थियो ।  भारतका लागि खेलको ६२ औं मिनेटमा कप्तान समिक्षाले बायाँ विङ्गसबाट आएको फ्रिकिकमा ६ यार्ड बक्सभित्रबाट हेडरमार्फत सहज गोल गरेकी थिइन् । त्यसअघि नेपाली गोलरक्षक अन्जना रानामगरले दोस्रो हाफको सुरुआतमै वन भर्सेस वनमा राम्रो बचाउ गरेकी थिइन् । 

टाइब्रेकरमा नेपालका लागि अन्जना रानामगरले दुई प्रहार बचाइन भने भारतको एक प्रहार क्रसबारमा लागेको थियो । नेपालका लागि पुजा रानाको प्रहार सफल हुन सकेन । गोलरक्षक अन्जना, रेखा पौडेल र मनिषा राउतले गोल गरेका थिए ।

 नेपाल समूह ‘बी’ को उपविजेताको रुपमा सेमिफाइनल पुगेको थियो । भारतले समूह चरणमा दुवै खेल जित्दै समूह ‘ए’ को विजेता भएको थियो । नेपालले समूह चरणको खेलमा पाकिस्तानलाई १२-० ले पराजित गर्दा बंगलादेशसँग भने २-१ ले पराजित भएको थियो ।