आइसिसी विश्वकप लिग २ मा नेपाल पराजित, तोडियो जितको शृंखला

काठमाडौं- आइसिसी विश्वकप लिग २ अन्तर्गत युएईमा जारी त्रिकोणात्मक शृंखलामा नेपालले आयोजक टिमसँग ६८ रनको हार बेहोरेको छ। लगातार पाँच खेलमा जित निकालेको नेपाली टिमले छैटौं खेलमा भने हार बेहोरेको हो।

दुई अन्तर्राष्ट्रिय रंगशालामा आयोजना भएको खेलमा नेपालले टस जितेर पहिले बलिङ रोजेको थियो। पहिलो पारीमा युएईले निर्धारित ५० ओभरमा आठ विकेट गुमाएर २०७ रन बनाएको थियो।

२०८ रनको लक्ष्य पाएको नेपालले ३१ ओभर पाँच बलमा अल आउट हुँदै १३९ रन बनाएपछि ६८ रनको हार बेहोरेको हो। प्लेयर अफ दि म्याचसमेत बनेका युएईका रोहन मुस्तफाले तीन विकेट लिए भने ७६ बलमा ५२ रन बनाएका थिए। उनले नेपालका आरिफ शेख, दिपेन्द्र सिंह ऐरी र सोमपाल कामीलाई सस्तैमा आउट गराएका थिए।

नेपालका लागि कुशल मल्लले ६० रन बनाए भने अन्य खेलाडीले विर्सनलायक प्रदर्शन गरे। ज्ञानेन्द्र मल्ल रोहित पौडेल र आरिफ शेख भने शून्य रनमै आउट भएका थिए। खेलमा युएईका कार्तिक मेयाप्पनले तीन विकेट गिराएका थिए। यो जितसँगै युएईले ३० खेलबाट ३१ अंक बनाएको छ भने नेपालको २८ अंक रहेको छ।