यू-१९ विश्वकप छनोटमा नेपालले यूएईलाई दियो १९२ रनको लक्ष्य

काठमाडौं- आईसीसी यू-१९ विश्वकप एसिया छनोट अन्तर्गत अन्तिम खेलमा नेपालले यूएईलाई १९२ रनको लक्ष्य दिएको छ। यूएईको अजमानस्थित एडेन गार्डेन ओभलमा टस हारेर पहिले ब्याटिङको निम्तो पाएको नेपालले ४८.५ ओभरमा सबै विकेट गुमाएर १९१ रन जोडेको हो।

यू-१९ विश्वकपमा छनोट हुनका लागि निर्णायक खेलमा नेपालले अब १९१ रन डिफेण्ड गर्नुपर्नेछ। नेपालका लागि कप्तान देव खनाले अर्धशतक प्रहार गरे। देवसँगै उत्तम थापा मगर र विशाल विक्रम केसीले नेपालको इनिङ्स सम्हालेका थिए। १९ रनमै सुरुवाती ३ विकेट गुमाएपछि देव र उत्तमले चौथो विकेटका लागि ८४ रनको साझेदारी गरे।

ओपनर दिपक बोहरा पहिलो ओभरमै खाता नखोली आउट हुँदा अर्का ओपनर अर्जुन कुमाल ३ र आकाश त्रिपाठी ९ रन बनाएर आउट भए।

नेपालका लागि कप्तान देवले सर्वाधिक ५१ रन बनाउने क्रममा ८४ बल खेल्दै ३ चौका र १ छक्का प्रहार गरे। विशालले ५० बल खेल्दै ५ चौका मद्दतमा ३८ रन बनाए। उत्तमले ४८ बल खेल्दै ३ चौका र १ छक्का मद्दतमा ३६ रन जोडे।

छैटौं विकेटका लागि विशालले मिलन बोहरासँग ५० रनको साझेदारी गरे। मिलन १० रन बनाएर आउट भए। हेमन्त धामीले १३ रन जोडे। सुबास भण्डारी २ रनमा आउट भए। दिपेश कँडेल १५ रन बनाए। 

यूएईका लागि ध्रुव पारासारले ३ तथा हरित सेट्टी, कप्तान आयान खानले २-२ विकेट लिए। हर्सिथ सेठ र अमर बदामीले समान १ विकेट लिए।