यू-१९ विश्वकप छनोटमा नेपालको लगातार तेस्रो जित

काठमाडौं-  नेपाली यू-१९ टिमले आईसीसी यू-१९ पुरुष विश्वकपको एसिया छनोटमा लगातर तेस्रो जित निकालेको छ। छनोटको तेस्रो खेलमा नेपालले हङकङविरुद्ध ९ विकेटको सानदार जित दर्ता गरेको हो। 

यूएईको मलेका क्रिकेट मैदानमा १ सय २१ रनको लक्ष्य पाएको नेपालले २२ ओभरमै १ विकेट गुमाएर आवश्यक रन पुरा गरेको हो। नेपाललाई जितसम्म पुर्‍याउनको लागि आकाश त्रिपाठीले त्रिपाटीले ७१ बलमा ५ चौका र ३ छक्काको सहयोगमा अविजित ५८ रन बनाए। त्यस्तै, ब्याटर उत्तम थापाले ५० बलमा ४ चौकाको साथ अविजित ३९ रन बनाउँदा अर्जुन कुमाल १६ रनमा आउट भए। 

खेलमा सुरुआति ब्याटिङ गरेको हङकङले ४६ ओभर ३ बलमा अलआउट हुदै १ सय २० रन जोडेको थियो। हङकङका लागि पर्थ भागवातले ३६ रन र मोहम्मद जाहिरले २९ रन बनाएका थिए। बलिङतर्फ नेपालका लागि हेमन्त धामीले ३, आकाश चन्द र सुवास भण्डारीले समान २–२ विकेट गिराएका थिए भए एक विकेट लिनेमा दीपेश कंडेल रहे। प्रतियोगितामा नेपालसहित सिंगापुर,कुबेत,हङकङ,मलेसिया र आयोजक यूएईको सहभागीता रहेको छ।

अब नेपालले आफ्नो चौथो खेलमा भोलि मंगलबार मलेसियाको सामना गर्नेछ। त्यस्तै,  नेपालले २ मार्च बुधबार घरेलु टोलीसॅंग खेल्नेछ।