भारतलाई हराउँदै नेपाल विश्व फुटभलीको क्वाटरफाइनलमा

काठमाडौं- भारतको केरलामा जारी २५औं विश्व फुटभली प्रतियोगितामा भारतलाई पराजित गर्दै नेपाल क्वाटरफाइनल प्रवेश गरेको छ। वेष्ट अफ थ्रीको सेटमा भएको खेलमा नेपालले भारतलाई २–१ ले हराउँदै अन्तिम आठमा पुगेको हो।

खेलको पहिलो सेट नेपालले भारतलाई १५–९ ले जितेको भए पनि नेपाल दोस्रो सेट भारतसंग १४–१६ ले गुमाउन पुगेको थियो। तर तेस्रो सेटमा तालमेल मिलाउँदै भारतलाई १६–१० ले पराजित गरेर क्वाटरफाइनल प्रवेश गरेको हो। नौ राष्ट्र सहभागी यस प्रतियोगितामा नेपालले सेमिफाइनल प्रवेशका लागि फ्रान्सको सामना गर्नेछ।
खेलाडीको साथमा फुटभली संघ इन्डियाको निमन्त्रणामा नेपालको तर्फबाट टोखा नगरप्रमुख प्रकाश अधिकारी विश्व च्याम्पियनसिप प्रतियोगितामा अतिथिका रुपमा सहभागी रहेका छन्। उनलाई केराला कर्पोरेसनका प्रमुख मेयर डा. विना फिलिपले स्वागत गरेकी थिइन्। प्रशिक्षक राजुविक्रम थापाको प्रशिक्षणमा रहेको नेपाली टोलीको हेड अफ डेलिगशनका रुपमा मनिष जोशी रहेका छन्।