यू-१९ विश्वकप छनोटः आकाश र विशालको अर्धसतकमा सिंगापुरलाई ठूलो लक्ष्य

काठमाडौं-  काठमाडौं-  युएइमा जारी आईसीसी यू–१९ एसिया विश्वकप छनोटमा नेपालले आफ्नो पहिलो खेलमा सिंगापुरविरुद्ध बलियो लक्ष्य पेस गरेको छ। 

नेपाली यू-१९ टिमका आकाश त्रिपाठी र विशाल विक्रम केसीले अर्धसतक बनाएपछि नेपालले विपक्षी सिंगापुरविरुद्ध २ सय ६२ रनको लक्ष्य प्रस्तुत गरेको हो।

आजैबाट सुरु भएको प्रतियोगितामा नेपालले टस जितेर ब्याटिङ गर्दै निर्धारित ५० ओभरमा ७ विकेट गुमाएर २ सय ६१ रन बनाएको छ। युएईको अजमानको इडेन गार्डेन ओभल मैदानमा आकाशले १ सय बल खेल्दै ७ चौका र १ छक्काका साथ ७८ रन बनाएका छन्। उनी ३४औं ओभरमा आउट हुँदा नेपालको स्कोर १ सय ४५ रन थियो। ब्याटर आकाशले अर्जुन कुमालसँग दोस्रो विकेटमा ९३ रनको साझेदारी गरेर नेपालाई ठूलो स्कोरमा पुग्न सहयोग गरेका थिए। अर्जुनले पनि ६७ बल खेल्दै ३ चौकासहित ३७ रन बनाए।

कप्तान देव खनालले २१ रन, दीपक बोहरा ‘बी’ले १७, दीपक डुम्रेले १० र  मिलन बोहराले ४ रन मात्र बनाउन सके। मध्य क्रममा विशालले अविजित ६३ रन बनाए। उनले ६४ बल खेल्दै ४ चौका र २ छक्का प्रहार गरेका थिए। सुवास भण्डारी १ चौका प्रहार गरी ८ बलमा १२ रन बनाई अविजित रहे। सिंगापुरका लागि अर्याविर चौधरी र अभुदय छाजरले २–२ विकेट लिएका छन्।