पुलिसलाई हराउँदै चर्च बोइज भद्रपुर झापा गोल्डकपको क्वार्टरफाइनलमा

काठमाडौं- यो वर्ष मात्र ए डिभिजनमा उक्लिएको चर्च बोइज क्लबले झापामा भइरहेको भद्रपुर झापा गोल्डकपमा नेपाल पुलिस क्लबविरुद्ध ३–० को जित निकालेको छ।

झापाको मेची रंगशालामा सम्पन्न भएको खेलमा चर्च बोइजले विभागीय क्लबविरुद्ध सहज जित निकालेको हो।

चर्च बोइजलाई क्वार्टरफाइनलमा पुर्‍याउनका लागि आशिष चौधरीले दुई गोल गरे भने गगनदिप सिंहले एक गोल गरेका थिए। अब उसले क्वार्टरफाइनल खेलमा लिग च्याम्पियन मछिन्द्र क्लबको सामना गर्नेछ।

गोल्डकपमा यसअघि भएको खेलमा आयोजक भद्रपुर ब्लेजर्सले भारतको जयगाउँलाई हराएको थियो। भोली हुने खेलमा संकटा क्लबले आयोजक भद्रपुरको सामना गर्नेछ।