स्पट फिक्सिङमा संलग्न भनिएका आलम र अन्सारीले भनेः प्रस्ताव अस्विकार भयो

काठमाडौं – स्पट फिक्सिङमा संलग्न रहेको र फिक्सिङ गरेको आरोपमा थुनामा परेका पूर्व खेलाडी महबुब आलम र आदिल अन्सारीले फिक्सिङ नगरेको बयान दिएका छन्।

गएको पुषमा काठमाडौंमा आयोजना भएको नेपाल टी २० लिगमा स्पट फिक्सिङ गरेको आरोपमा उनीहरुलाई प्रहरीले पक्राउ गरेको थियो। सो प्रतियोगितामा आदिलले जनकपुर रोयल्सबाट खेलेका थिए भने महबुब टोलीमा थिएनन्। महबुबले आदिलसँगै आरिफ खेशलाई पनि प्रस्ताव गरेका थिए।

महबुबले फिक्सिङको प्रस्ताव खेलाडीसम्म पुर्याएको बयान दिएका छन्। तर उनले राखेको प्रस्ताव खेलाडीले स्विकार नगरेको बताएका छन्। बयानमा महबुबले रवी माझी भन्ने व्यक्तिसँग छ लाखमा स्पट फिक्सिङको प्रस्ताव दिएर खेलाडीलाई चार लाख दिने भनि प्रस्ताव गरेको उल्लेख छ।

कुनै खेलमा ५ रनभन्दा कम बनाएर आउट भएमा वा बलिङ गर्दा १० रनभन्दा धेरै दिएमा चार लाख पाउने भनि महबुलले प्रस्ताव गरेका थिए। यता, मोहम्मद आदिल आलमले आफूलाई सामाजिक सञ्जाल वाट्सएपमा अर्को प्रस्ताव पनि आएको बताएका छन्।

उनले भारतका शेख नामक मानिसले एक लाखको प्रस्ताव गरेको पनि बताएका छन्। उनले बयानमा भनेका छन्, ‘मेरो लागि एउटा नो बल बल र  वाइड बल  फालिदेउ  सो वापत १ लाख रकम दिने भनी प्रस्ताव राखेका थिए तर मैले निजलाई तत्कालै यस्तो विषयमा मसँग कुरा नगर्नु भनि निजसँग कुरा गर्न छाडिदिएको थिएँ।’