भद्रपुर झापा गोल्डकपः आयोजक टिमले भारतको जयगाउँलाई हरायो

काठमाडौं- झापामा हिजोबाट सुरु भएको भद्रपुर झापा गोल्डकपमा आयोजक भद्रपुर ब्जलेजर्सले २–० को जित निकालेको छ। सहिद स्मारक ए डिभिज क्लब खुमलटारका अधिकांश खेलाडी अनुबन्ध गरेर प्रतियोगितामा उत्रिएको भद्रपुरले विजयी सुरुआत गरेको हो।

पहिलो हाफ गोलरहित बराबरीमा रोकिएको भए पनि ५५औं मिनेटमा आयोजक टिमका विदेशी खेलाडी स्टेफेन समिरले गोल गरेका थिए। मेसुके ओलुमेउको पासमा उनले गोल गरेका हुन्।

त्यस्तै, खेलको ८०औं मिनेटमा मेसुकले नै गोल गरेका थिए। उनी खेलको म्यान अफ दि म्याचसमेत बने। खेलको धेरै समय जयगाउँले दबाब बनाए पनि गोल गर्न भने सकेन।

नकआउट शैलीबाट भइरहेको गोल्डकपअन्तर्गत आजको खेलमा नेपाल पुलिस क्लबले अर्को ए डिभिजन क्लब चर्च बोइजको सामना गर्नेछ।