तराईका महिलाहरुमा जितिया पर्वको रौनक  

जनकपुरधाम- तराईवासी महिलाहरुको साझा पर्व जितियाको रमझम शुरु भएको छ । विवाहिता महिलाहरुले सोमबार बिहान जलाशय पुगेर पूजाअर्चना गर्दै ब्रत शुरु गरेका छन् ।

हरेक खाले विपद तथा दुःख कष्टबाट जोगिन र परिवार एवं सन्तानको रक्षार्थ महिलाहरु जितिया मनाउने गर्दछन् । घटस्थापना भन्दा करिब डेढ साता अगाडी असोज कृष्ण अष्टमीदेखि तीन दिनसम्म जितिया मनाउने गरिन्छ ।

यस पर्वमा सन्तान तथा पतिको सुखसमृद्धिका लागि स्याल, बाज र मृत श्रेष्ठजनको पुजा गर्ने परम्परा रहेको छ । यस पर्वको पहिलो दिन सोमबार ब्रतालु ‘नहाय खाए’ अर्थात नुहाई धोआई गरेर शुद्ध भई खाने गरिन्छ ।

नहाय खाय ब्रतका दिन ब्रतालु महिलाहरु नदी, पोखरी तथा जलासयमा स्नान गरी घिरौलाको पातमा पिना, तेल, सिन्दुर लगायतका सामग्री सूर्यपुत्र शालिवाहनका छोरा जितवाहनलाई चढाउने गर्दछन् । यस पर्वमा ब्रतालु महिलाहरुले ‘नहाय खायको’ दिन ब्रतालु महिलाहरुले माछा र कोदोको रोटी खाने परम्परा रहेको छ ।

पर्वको दोस्रोदिन देखि ब्रतालुहरु २४ घण्टा लामो निराहार उपवास बस्ने गर्दछन् । ब्रत बसेका महिलाहरु एकै स्थानमा जम्मा भई भगवान जितवाहनको कथा सुन्ने परम्परा समेत रहेको छ । जितिया ब्रत बसेका महिलाहरुले थुकसमेत निल्न नहुने मान्यता रहेको छ । ब्रतालु महिलाले थुक निले ब्रत नै टुंगिने बताउँछिन धर्मशीला कर्ण । 

सोमबार राति खाना खाइसकेपछि ब्रतालु महिलाहरुले मंगलबार दिन र रातभर पानीसमेत नखाएर निराहार बस्नु पर्ने उनको भनाइ छ । पर्वको अन्तिम दिन ब्रतालु महिलाहरु पुनः नदी, पोखरी र जलासयमा स्नान गरेर चिउरा, दही तथा सखरको प्रसाद बनाई अर्घ दिइसकेपछि जितिया ब्रत समाप्त हुन्छ ।