निधि भन्छन्- संघीयता ध्वस्त पार्न खोज्दैछ सरकार

घोराही- कांग्रेस उपसभापति विमलेन्द्र निधिले वर्तमान सरकार संघीयतालार्नै ध्वस्त पार्न उद्यत भएको आरोप लगाएका छन्। 

प्रेस युनियन दाङले घोराहीमा आयोजना गरेको पत्रकार सम्मेलनमा उनले भने, ‘संघीय व्यवस्थाले निर्दिष्ट गरेका कुनै पनि काम वर्तमान सरकारले गरेको छैन। यसबाट संघीय व्यवस्था नै ध्वस्त हुने आशंका बढेको छ।’

मुलुकमा आपराधिक घटना बढिरहेको र त्यसमा संलग्नलाई पक्राउ गरेर कारवाही गर्न सरकार असफल देखिएको बताए। कञ्चनपुरकी १३ वर्षीया किशोरी निर्मला पन्तको बलात्कारपछि हत्यामा संलग्नलाई बचाउन सरकार आफैं लागिपरेको निधिको आरोप थियो। ‘यसबाट सरकार कति निरीह छ भन्ने प्रस्ट हुन्छ,’ निधिले भने, ‘पीडित परिवारले न्याय मागिरहेको छ। सरकार भने दोषीलाई बचाउन लागिपरेको छ।’

वर्तमान सरकारका गतिविधिबाट जनता आजित देखिन थालेको उनको दाबी थियो। सत्तारुढ दलकै वरिष्ठ नेताले देश डुब्न लाग्यो भनेर संसदमा गुहार मागिरहेको उनले उल्लेख गरे। 'यसबाट वर्तमान सरकारको असफलता पुष्टि गर्छ,’ निधिले भने।