निर्मला हत्याकाण्ड : महेन्द्रनगरमा धर्ना, धनगढीमा विधार्थी सडकमा  

 
धनगढी- कञ्चनपुरकी १३ वर्षीया बालिका निर्मला पन्त हत्याकाण्डबारे उच्चस्तरीय छानबिन समितिले पेश गरेको प्रतिवेदन सार्वजनिक गर्न माग गर्दै महेन्द्रनगरको धर्ना सुरु गरिएको छ । 

धनगढीमा शनिवार नै विधार्थीले जुलुस निकालेका छन् । निर्मला हत्याकाण्डमा संलग्नलाई कारबाही र निर्मलालाई न्याय दिलाउन माग गर्दै बिधार्थी सडकमा उत्रिएका हुन् । बेलुकीपख ट्राफिक चौराहबाट कालै पहिरनमा सटेपिङ स्टोन स्कुलका विधार्थीले जुलुस निकाले । 

बलात्कारीलाई फासिदे , छोरीको सुरक्षा दिन नसक्ने सरकार चाहिदैन जस्ता नारा लगाउदै बजार परिक्रमा गरेका छन् । महेन्द्रनगरको मदनचोकमा शनिबारदेखि अनिश्चितकालिन धर्ना सुरु गरिएको हो ।  निर्मला हत्याबारेको प्रतिवेदन सार्वजनिक गर्न दबाब दिन धर्ना बस्न बाध्य भएको अधिकारकर्मी माया नेगीले बताईन् ।


प्रतिवेदन सार्वजनिक नगरेर सरकारले बलात्कारीलाई बचाउन खोजेको उनको आरोप छ । प्रतिवेदन सार्वजनिक गरेर दोषीलाई कारबाही नगरेसम्म धर्ना जारी रहने उनीहरुले बताएका छन्।मृतक निर्मलाका बुवा यज्ञराज पन्तले पनि तत्काल प्रतिवेदन सार्वजनिक गरेर दोषीमाथि कारबाही गर्न माग गरेका छन् ।

गृहमन्त्रालयले सहसचिव हरिप्रसाद मैनालीको नेतृत्वमा गत भदौ ७ गते गठन गरेको उच्चस्तरीय छानबिन समितिले घटनाबारे एक महिना अध्ययन गरी तयार पारि गृहमन्त्री राम बहादुर थापालाई बुझाएको प्रतिवेदन सार्वजनिक गरिएको छैन ।