कर्णालीमा हिल्सा-जमुनाह फास्ट ट्रयाक बनाइने, ‘एयरलाइन्स’ चलाइने 

सुर्खेत–चीन भ्रमणबाट फर्किएपछि कर्णाली प्रदेशका मुख्यमन्त्री महेन्द्रबहादुर शाहीले प्रदेश विकासका लागि दुई वटा सपना देखेका छन् । पहिलो विदेश भ्रमर्ण सकेर सुर्खेत फर्किएयता मुख्यमन्त्री शाहीले चीनकै सहयोगमा हिल्सा–जमुनाहा फाष्ट ट्रयाक सञ्चालनमा ल्याउनेदेखि ‘कर्णाली एयरलाइन्स’ चलाउनेसम्मको सपना देखेका हुन् । 

‘हिल्सा–जमुनाह फास्ट ट्रयाक निर्माणको लागि चिनियाँ पक्षसँग समझदारी भएको छ’ मुख्यमन्त्री शाहीले भने ‘केही समयमै ‘फिजिबिलिटी’ अध्ययन र प्रारम्भिक सर्भे हुनेछ ।’ अध्ययनपछि कुरा मिल्यो भने संघीय सरकार र चाइना हाइवे कम्पनीबीच सम्झौता गरी काम अघि बढाउने उनको भनाई छ ।

यस्तै मुख्यमन्त्री शाहीले कर्णालीमा चीनकै सहयोगमा प्रदेश सरकारले एयरलाइन्स चलाउने पनि सपना देखेका छन् । चीन सरकारसँग बैदेशिक ऋणबारे छलफल भएको जानकारी दिँदै शाहीले भने ‘प्रदेश सरकारले कर्णाली एयर चलाउने कि भन्ने सोच बनेको छ ।’ 

ऋण मागेर प्रदेशमा आन्तरिक उडान र अन्तरप्रदेशीय उडान लागि कम्तिमा दुईवटा विमान खरीद गर्न सकिने उनको भनाई छ । यस्तै भ्रमणमा सुर्खेत विमानस्थल स्तरोन्नति र मदाने चौरमा प्रस्तावित क्षेत्रीय अन्तर्राष्ट्रिय विमानस्थल निर्माणका लागि सहयोगको छलफल भएको शाहीले बताए ।

सिचुवान प्रान्तका गभर्नर यीनलीको निमन्त्रणमा मुख्यमन्त्री शाही तीन सदस्यीय टोलीसहित असोज ३ गते चीन गएका थिए ।