बागमती प्रदेशमा सरकार गठनको आह्वान

काठमाडौं– बागमती प्रदेशका प्रदेश प्रमुखले मुख्यमन्त्रीको दाबी पेस गर्न दलहरुलाई आह्वान गरेका छन्। प्रदेश प्रमुख यादवचन्द्र शर्माले बिहीबार सूचना जारी गर्दै सरकार गठनका लागि मुख्यमन्त्रीमा दाबी पेस गर्न आह्वान गरेका हुन्।

संविधानको धारा १६८ को उपधारा १ बमोजिम कुनै पनि दलको बहुमत नदेखिएकाले धारा १६८ को उपधारा २ अनुसार प्रदेशमा प्रतिनिधित्व गर्ने दुई वा दुईभन्दा बढी दलहरुको समर्थनमा बहुमत प्राप्त गर्न सक्ने प्रदेश सांसदलाई मुख्यमन्त्रीमा दाबी पेस गर्न भनिएको छ। 

प्रदेशको मुख्यमन्त्री नियुक्त गर्नका लागि पुस २५ गते बेलुका ४ बजेसम्मको समय दिइएको छ। उक्त समयभित्र बहुमतसहित मुख्यमन्त्रीमा दाबी पेस गर्न प्रदेश प्रमुख शर्माले आह्वान गरेका छन्। 

बागमती प्रदेशसभामा कांग्रेसका ३७, नेकपा एमालेका २७, नेकपा माओवादी केन्द्रका २१, राष्ट्रिय प्रजातन्त्र पार्टीका १३, नेकपा एकीकृत समाजवादीका सात, नेपाल मजदुर किसान पार्टीका तीन र हाम्रो नेपाली पार्टीका दुई गरी एक सय १० जना  सदस्य छन्।