कांग्रेस संसदीय दलमा देउवा र गगन-शेखर समूह को कति बलियो?

काठमाडौं– कांग्रेस संस्थापन इतर पक्षमा संसदीय दलको नेतामा जेलिएको धागो अन्ततः फुकेको छ। संस्थापन इतर पक्षबाट साझा उम्मेदवारका रूपमा गगन थापा सभापति शेरबहादुर देउवासँग भिड्ने भएका छन्। 

दलको नेताका लागि आज दिउँसो २ देखि ३ बजेसम्म उम्मेदवारी दर्ताको समय छुट्याइएको छ। यसअघि इतर पक्षबाट शेखर कोइराला र गगन थापाले आफ्नो आफ्नो दाबी कायम राखेपछि सहमति हुन सकेको थिएन।

गगनले  डा‍. शेखर कोइरालालाई प्रस्तावक बनाउँदै संसदीय दलको नेताका लागि मनोनयन दर्ता गराइसकेका छन्। उनको समर्थकमा उपसभापति धनराज गुरुङ र महामन्त्री विश्वप्रकाश शर्मा छन्।

पटक–पटकको छलफलपछि मंगलबार लैनचौरको एक होटलमा बसेको शेखर कोइराला समूहको बैठकमा गगनलाई सभापति देउवासँग संसदीय दलको नेतामा भिडाउने समझदारी जुटेको हो। गगनलाई शेखरसहित उपसभापति गुरुङ, सहमहामन्त्री बद्री पाण्डे, अर्जुननरसिंह केसी, दिलेन्द्रप्रसाद बडू, चन्द्र भण्डारीलगायत नेताहरूको साथ छ।

कांग्रेसको १३औं महाधिवेशनमा देउवाका विश्वासपात्रका रूपमा रहेका अर्का महामन्त्री विश्वप्रकाश शर्मा चुनावअघि नै गगनको पक्षमा खुलेका थिए। उनले त्यसबेला आफू गगनको प्रस्तावक बस्ने घोषणा गरेका थिए। 

मंगलबार गगनलाई समर्थन गर्न शेखर तयार भइसकेपछि शर्मा हनुमानस्थानस्थित होटल बसेरामा बसेको इतर समूहको दोस्रो बैठकमा पुगेका थिए। शर्मा होटल पुगेलगत्तै बाहिर निस्किएर अर्जुननरसिंह केसीले उनको हात समातेर बैठक कक्षमा प्रवेश गराएका थिए। बैठक कक्षमा पुगेर शर्माले गगनलाई शुभकामना दिँदै आफ्नो पूर्ण साथ रहने बताए।

यसअघि आजै बिहान लाजिम्पाटस्थित होटल एम्बास्डरमा बसेको बैठकमा भने शर्मा सहभागी थिएनन्।

आजको भेलामा शेखरले प्रस्ताव गरेपछि महामन्त्री थापा संसदीय दल नेता उठ्ने पक्कापक्की भएको हो। शेखर गगनको प्रस्तावक बसेका छन्। कांग्रेस नेता अर्जुननरसिंह केसीका अनुसार १५औं महाधिवेशनमा शेखरलाई गगन समूहले सभापतिमा समर्थन गर्ने पनि सहमति भएको छ। 'दुई नेताको संवाद निकै सकारात्मक रह्यो। अहिले कोइरालाले दलको नेतामा आफ्नो समूहबाट गगनलाई र १५औं महाधिवेशनमा सभापतिमा गगनजीले कोइरालालाई साथ दिने समझदारी भएको छ,' उनले भने।

निर्वाचन समितिका संयोजक भीष्मराज आङ्देम्बेका अनुसार उम्मेदवारको प्रथम नामावली आज दिउँसो ३ः३० बजे प्रकाशन हुनेछ। आजै दिउँसो ३ः३० देखि ४ बजेसम्म उम्मेदवारको नामावलीमाथि दाबीविरोध, दिउँसो साढे ४ बजे उम्मेदवारको दोस्रो नामावली प्रकाशन हुने र आजै साँझ ५ः४५ बजे अन्तिम नामावली प्रकाशन हुनेछ।

भोलि बुधबार बिहान ८ देखि १० बजेसम्म संसदीय दलको नेता छान्न मतदानका लागि समितिले समय निर्धारण गरेको छ। इतर पक्षमा सहमति भएपछि अब संसदीय दलको नेता को बन्छ भन्ने आमचासो बनेको छ। 

गत मंसिरमा सम्पन्न निर्वाचनको परिणामअनुसार कांग्रेसका प्रत्यक्षतर्फ ५७ र समानुपातिकतर्फ ३२ गरी कुल ८९ सांसद छन्। संसदलीय दलको नेता छनोटका लागि हुने निर्वाचनमा यिनै ८९ जना सांसदले भोट हाल्न पाउनेछन्। 

कांग्रेसका अधिकांश सांसद देउवाको पक्षमा रहेको जानकारको दाबी छ। देउवा पक्षका एक नेताको दाबीअनुसार संस्थापन पक्षतर्फ हालसम्म ५० भन्दा बढी सांसद खुलिसकेका छन्। यस हिसाबले शेखर–गगन समूहमा ४० भन्दा कम सांसद छन्। 

पार्टीमा देउवा बलियो रहेको स्वीकारोक्ति गगन पक्षका नेताको पनि छ। तर संस्थापन पक्षमा जुटेको सहमतिका कारण सकारात्मक सन्देश प्रवाह भएको र परिणाम उल्टिन सक्ने अपेक्षा पनि उनीहरूको छ।