च्याम्पियन्स लिग : युभेन्ट्सको जितमा रोनाल्डोलाई रातो कार्ड

एजेन्सि-च्याम्पियन्स लिग अन्तर्गत गतराति भएको खेलमा युभेन्टसले सुखद सुरुवात गरेको छ । युभेन्ट्सले भ्यालेन्सियालाई २-० ले पराजित गर्दै च्याम्पियन्स लिगमा सुखद सुरुवात गरेको हो । 

तर, मैदानमा पोर्चुगिज फरवार्ड क्रिस्टियानो रोनाल्डोले रातो कार्ड खाएका छन् । उनले विपक्षी टोलीका खेलाडीलाई हात लगाएको आरोपमा खेलको २९ औं मिनेटमा रातो कार्ड खाँदै बाहिरिएका थिए । 

खेलको २९ औं मिनेटमा युभेन्ट्स १० खेलाडीमा सिमित भएको थियो । स्टार फरवार्ड क्रिस्टियानो रोनाल्डोले भ्यालेन्सियाका डिफेन्डर मुरिलोलाई हात लगाएपछि रेफ्रिले अतिरिक्त रेफ्रिको सल्लाह अनुसार रातो कार्ड दिएका थिए ।

युभेन्ट्सले दुबै गोल पेनाल्टी मार्फत गरेको थियो । रोनाल्डोको प्रस्थानपछि केहि दवाव परेपनि युभेन्टसले रक्षात्मक रुपमा भने खेल बलियो बनाइरहेको थियो । पहिलो हाफको अन्तिम मिनेटमा भ्यालेन्सिया कप्तान ड्यानी परेहोको गल्तीमा युभेन्टसले पेनाल्टी पायो । 

डिफेन्डर जोआओ क्यान्सेलोलाई पेनाल्टी क्षेत्रभित्र लडाए पछि रेफ्रिले पेनाल्टी दिए । मिरालेम प्यानिचले त्यसमा सहजै गोल गरे ।

दोस्रो हाफमा पनि युभेन्टसले पेनाल्टी पायो र प्यानिचले त्यसमा पनि कुनै गल्ती नगरी टोलीलाई २-० को अग्रता दिलाए । यता भ्यालेन्सियाले खेलको अन्तिम समयमा पाएको पेनाल्टी भने कप्तान परेहोले गोल गर्न सकेनन् । 

रातो कार्ड पाएका रोनाल्डो अर्को खेलमा पनि उपलब्ध हुने छैनन् । यद्यपि क्लबले यूईएफए समक्ष अपिल गर्ने सम्भावना पनि छ ।