निजी घर बनाउन नगरपालिकाको गाडी दुरुपयोग, रिपोर्टिङ गर्न पुगेका पत्रकारलाई बनाइन् बन्धक

काठमाडौं– कैलालीको लम्कीचुहा नगरपालिकाकी मेयर सुशीला शाहीमाथि अर्को गम्भीर आरोप लागेको छ। उनले आफ्नो निजी घर बनाउन नगरपालिकाको ट्र्याक्टरलगायत सवारीसाधन र अन्य सामानहरू प्रयोग गर्ने गरेको आरोप लागेको हो। नगरपालिकाको गाडीमा शाहीले निजी प्रयोजनका लागि काठ ओसार्न प्रयोग गरिरहेको भिडियो समेत बाहिरिएको छ।

कार्यालयका सामानको दुरुपयोग गर्ने खबर पाएपछि रिपोर्टिङ गर्न पुग्दा आफूलाई बन्धक बनाएको आरोप एक पत्रकारले लगाएका छन्। न्यूज ट्वान्टीफोर टेलिभिजनको सुदूरपश्चिम ब्यूरोमा कार्यरत पत्रकार खेम ढुंगानाले आफूलाई मेयर शाहीले बन्धक बनाएको बताएका हुन्। आफूसँग भएका सञ्चार सामग्री पनि मेयर शाहीले नियन्त्रणमा लिएको उनको आरोप छ। उनले भनेका छन्, ‘प्रहरीकै अगाडि नियन्त्रणमा लिई रिपोर्टिङका लागि खिचिएको भिडियो फुटेज डिलिट गरियो।’

यसअघि मेयर शाहीमाथि आफ्नै शोरुमबाट कार्यपालिकामा छलफल नै नगरी टेन्डरबिनै वडाध्यक्षका लागि भनेर १० वटा मोटरसाइकल किनेको आरोप लागेको थियो। करिब ४० लाख रुपैयाँ सरकारी बजेट दुरुपयोग गरी नगर कार्यपालिकामा प्रस्ताव नै नलगी स्वमर्जी मोटरसाइकल किनेपछि उनी विवादमा तानिएकी थिइन्। सार्वजनिक खरिद ऐन छल्न ४ महिनाको अवधिमा उनले पटकपटक गरेर आफ्नो शोरुमबाट वडाध्यक्षका लागि भनेर सवारी खरिद गरेकी थिइन्।