च्याम्पियन्स लिग : मेस्सीले ह्याट्रिकमा रोनाल्डोलाई उछिने

बार्सिलोना-बार्सिलोनाका कप्तान लिओनेल मेसीले उत्कृष्ट ह्याट्रिक प्रहार गरेपछि च्याम्पियन्स लिगमा सर्वाधिक ह्याट्रिकर्ता बनेका छन् । च्याम्पियन्स लिगमा अन्तर्गत मंगलबार समूह चरणको पहिलो खेलमा पीएसभीलाई ४-० को फराकिलो अन्तरले पराजित गर्दा मेस्सीले ह्याट्रिक प्रहार गरेका थिए ।

यससँगै बार्सिलोनाले च्याम्पियन्स लिगमा विजय सुरुवात गरेको छ । उनले ३१ औं मिनेट, ७७ औं मिनेट र ८९ औं मिनेट गरि आफ्नो ह्याट्रिक पुरा गरेका थिए । च्याम्पियन्स लिग इतिहासमा मेसीको यो आठौँ ह्याट्रिक पनि थियो । 

यस ह्याट्रिकसँगै मेसीले च्याम्पियन्स लिगमा ह्याट्रिक गर्ने सुचिमा रोनाल्डोलाई उछिनेका छन् । च्याम्पियन्स लिगमा पछिल्ला केहि सिजनयता पोर्चुगिज स्टार क्रिस्टियानो रोनाल्डोको एकल दबदबा रहँदै आएको छ । 

उनले प्रतियोगिताको उपाधि जित्ने मात्र नभएर सर्वाधिक गोलकर्तामा पनि लगातार सफलता हात पारेका छन् । पोर्चुगिज स्टार रोनाल्डोले च्याम्पियन्स लिगमा ७ पटक ह्याट्रिक गरेका छन् ।

मेसी र रोनाल्डो यस खेलअघि बराबर रहेपनि मेसीले तेस्रो पटक समूह चरणको पहिलो खेलमा नै ह्याट्रिक गर्दै उक्त रेकर्डमा आफ्नो नाम कायम गरे । रोनाल्डो र मेसीपछि तीन खेलाडीले ३-३ पटक ह्याट्रिक प्रहार गरेको तथ्यांक छ ।

तीन ह्याट्रिक प्रहार गर्नेमा मारियो गोमेज, लुइज आद्रियानो  र फिलिप्पो इन्जाघी रहेका छन् ।

च्याम्पियन्स लिगमा रोनाल्डोले बुधबार नै युभेन्ट्सका लागि डेब्यु गर्दैछन् । रोनाल्डोले पछिल्लो सिजन च्याम्पियन्स लिगमा १५ गोल गर्दै रियल म्याड्रिडलाई उपाधि दिलाएका थिए । पछिल्लो ५ सिजनमध्ये रोनाल्डोले ४ पटक उपाधि नै जितेका छन् । 

यसपटक पनि उनी टोलीलाई उपाधि दिलाउँदै गोल्डेन बुट हात पार्ने सुरमा हुनेछन् । त्यसका लागि रोनाल्डोसामु  ह्याट्रिक प्रहार गर्दै मेस्सीसँग कीर्तिमान नै बराबरी गर्ने अवसर पनि छ ।