च्याम्पियन्स लिगमा : लिभरपुलद्धारा पिएसजी पराजित

लिभरपुल-च्याम्पियन्स लिगमा लिभरपुलले विजय सुरुवात गरेको छ । समूह ‘सी’ मा रहेको लिभरपुलले आफ्नोे पहिलो खेलमा पेरिस सेन्स जर्मेन (पिएसजी) लाई पराजित गर्दै विजय सुरुवात गरेको हो । 

लिभरपुलको घरेलु मैदानमा भएको खेलमा फ्रेन्च लिग विजेता पिएसजीलाई ३-२ ले पराजित गर्यो । विजय टोली लिभरपुलका लागि ड्यानिएल स्टरेजल, जेम्स मिल्नर र रोबर्टो फर्मिनो गोल गरे । त्यस्तै यता पिएसजीका लागि केलियन एम्बाप्पेल र थोमस म्युनरर सान्तोना गोल गरेका थिए ।

घरेलु मैदानमा भएको खेलमा लिभरपुलले सुरुआती दुई गोल गर्यो । खेलको ३० औं मिनेटमा लिभरपुलका फरवार्ड ड्यानिएल स्टरेजले हेड मार्फत गोलगर्दै घरेलु टोलीलाई अग्रता दिलाए । उनले फुल ब्याक एन्ड्रु रोबर्ट्सनको क्रसलाई गोलमा परिणत गरेका थिए ।

खेलको ३६ औं मिनेटमा पाएको पेनाल्टी अवसरलाई सदुपयोग गर्दै जेम्स मिल्नरले लिभरपुलको अग्रता दोब्बर पारे । खेलको ४० औं मिनेटमा उत्कृष्ट गोल गर्दै थोमस म्युनररले पिएसजीलाई पहिलो हाफमै खेलमा फर्काए । 

दोस्रो हाफमा लिभरपुलका लागि मोहम्मद सलाहले गोल गरेपनि उनको गोललाई रेफ्रीले अस्विकार गरे। पिएसजीको बक्समा बल जित्ने क्रममा स्टुरेजले गोलकिपर अल्फोन्से अरिओलालाई फौल गरेकाले उक्त गोललाई मान्यता दिईएन । 

दोस्रो हाफमा फितलो प्रदर्शन गरेपनि पिएसजीलाई एम्बाप्पेले ८३ औं मिनेटमा बराबरी दिलाए । तर, ब्राजिलियन फरवार्ड रोबर्टो फर्मिनोले इन्जुरी समयमा उत्कृष्ट गोल गर्दै लिभरपुलको जित सुनिश्चित गरे । यस जितसँगै लिभरपुलले च्याम्पियन्स लिगमा सुखद सुरुवात गरेको छ ।