राष्ट्रिय राजनीतिमा माओवादीको भूमिका निर्णायक : प्रचण्ड

काठमाडौं– नेकपा माओवादी केन्द्रका अध्यक्ष पुष्पकमल दाहाल प्रचण्डले प्रतिनिधिसभामा  चाहेजस्तो सिट नआए पनि राष्ट्रिय राजनीतिमा पार्टीको भूमिका अहिले पनि निर्णायक रहेको दाबी गरेका छन्। शनिबार माओवादी निकट निजामती कर्मचारीको कार्यक्रममा अध्यक्ष प्रचण्डले राष्ट्रिय राजनीतिमा पार्टीको भूमिकालाई कसैले अवमूल्यन गर्नै नसक्ने दाबी गरेका हुन्।

‘१२२ पालिका माओवादीको कब्जामा हुनु भनेको सानो कुरा होइन। प्रदेशमा हामी २०७४ हाराहारीमै छौं। तर संघमा सोचेजस्तो, अपेक्षा गरेजस्तो भएन। हाम्रो भूमिका खुम्चियो भन्ने होइन। राष्ट्रिय राजनीतिमा हाम्रो भूमिका केन्द्रमै छ। त्यसलाई कसैले खोस्न सक्दैन,’ उनले भने।

चुनावी परिणामबाट निराश हुनु नपर्ने उनले बताए। २०६४ को निर्वाचनमा माओवादीले धेरै सिट जित्दा अरु पार्टी निकै सानो आकारमा पुगेको दृष्टान्त पेस गर्दै उनले आत्मसमीक्षा गरेर थप प्रयास गरिए पुन संगठित हुन सकिने दाबी गरे।