देउवाको पक्षमा माहोल बनाउँदै एनपी साउद, नेताहरु सँगको भेटवार्ता तीव्र

काठमाडौं- मंसिर ४ गते सम्पन्‍न आम निर्वाचनको अन्तिम मतपरिणाम सार्वजनिक भएसँगै दल तथा नेताहरु सरकार गठनका लागि कसरमा छन्। नेपाली कांग्रेस नेतृत्वको सरकार गठन हुने देखिएपछि कांग्रेसमा संसदीय दलको नेता चयनका लागि आन्तरिक गृहकार्य सुरु भएको छ। 

कांग्रेसभित्र संसदीय दलको नेताका लागि रस्साकस्सी चलिरहेका बेला सभापति शेरबहादुर देउवाको पक्षमा माहोल सिर्जना गर्न उनका विश्वास पात्रमध्ये एक नेता एनपी साउदले पनि भेटवार्तालाई तीव्रता दिएका छन्। 

कञ्चनपुर–२ बाट प्रतिनिधिसभा सदस्यमा निर्वाचित साउदले पछिल्लोपटक  काठमाडौं–१ बाट निर्वाचित प्रतिनिधिसभा सदस्य प्रकाशमान सिंहसँग भेटवार्ता गरेका छन्।  

उनी कांग्रेस केन्द्रीय सदस्य तथा पूर्व राज्यमन्त्री गोविन्दबहादुर शाहका साथ नेता सिंह भेट्न चाक्सीबारी पुगेका थिए। भेटवार्ता बुधबार भए पनि कांग्रेस नेतृ सिर्जना सिंहले बिहीबार मात्र तस्बिर सार्वजनिक गरेकी छन्। उनले ट्विटरमा तस्बिर साझा गर्दै लेखेकी छन्, ‘बधाई तथा शुभकामना आदानप्रदान,’ नेतृ सिंहले लेखेकी छन्। 

नेता साउदले बुधबार नै मोरङ–६ बाट निर्वाचित प्रतिनिधिसभा सदस्य डा. शेखर कोइरालासँग पनि भेट गरेको सचिवालयले जनाएको छ। सचिवालयका अनुसार उनले केही दिनअघि नागरिक उनमुक्ति पार्टीका संरक्षक रेशम चौधरीसँग पनि भेट गरेका थिए। 

तर, उनको सचिवालयले भेटघाटका क्रममा भएका कुराकानीबारे भने खुलाएको छैन। नेता साउदले शीर्ष तहका नेताहरूसँगको भेटवार्ताअघि नवनिर्वाचित प्रतिनिधिसभा सदस्य चन्द्र भण्डारीसँग पनि छलफल गरेको भण्डारीनिकट स्रोतले जनाएको छ।