प्रिमियर लिग : साउथह्याप्टन र ब्राइटनको बराबरी

साउथह्याप्टन (एजेन्सी)-इंग्लिस प्रिमियर लिग फुटबलमा साउथह्याप्टन र ब्राइटन एन्ड होभ अल्वियोनले बराबरी खेलेका छन्। साउथह्याम्पटन आफ्नो घरेलु मैदानमा ब्राइटनसँग २-२ गोलको बराबरीमा रोकिएको हो।

घरेलु टोलीका लागि पिरे इमिली र ड्यानी इंग्सले गोल गर्दा ब्राइटनका लागि सेन डफी र ग्लेन मुरेले गोल गरे। घरेलु टोलीले सोमबार राति भएको खेलमा २-० को अग्रता जोगाउन नसक्दा बराबरीमा रोकिन पुगेको हो।

३५औं मिनेटमा पिरे इमिलीले गोल गरेपछि घरेलु टोलीले पहिलो हाफमा १-० को अग्रता बनाएको थियो। ६५औं मिनेटमा ड्यानी इंग्सले पेनाल्टीमा गोल गरेपछि घरेलु टोलीले २–० को अग्रता बनाएका थियो।

तर, त्यसको २ मिनेटपछि सेन डफीले गोल गर्दै खेलमा फर्कने प्रयास गरे। इन्जुरी समयमा ब्राइटनले पेनाल्टीमा गोल गर्दै खेललाई २–२ को बराबरीमा ल्याए। बराबरीपछि साउथह्याम्पटन ५ खेलबाट ५ अंकसहित १३औं तथा समान ५ अंक भएपनि ब्राइटन गोल अन्तरमा पछि पर्दै १४औं स्थानमा छ। 

पाँच खेलमा शतप्रतिशत जित निकाल्दै १५ अंक जोडेको चेल्सी लिगको शीर्ष स्थानमा छ।