नदीको धार परिवर्तन हुनेगरी भारतले तटबन्ध बनाउँदा सरकार नबोल्नु अस्वभनीय : नेता रावल

काठमाडौं- नेकपा एमालेका नेता एवं पूर्व रक्षामन्त्री भीमबहादुर रावलले भारतले महाकाली नदीको धार परिवर्तन हुनेगरी तटबन्ध बनाउँदा पनि सरकार मौन बस्नु अस्वभनीय भएको बताएका छन्। नेता रावलले सोमबार राति सामाजिक सञ्जालमा ट्वीट गर्दै सरकारले यो विषयमा कुटनीतिक रुपमा कुनै पहल नगर्नु लज्जाको विषय भएको बताए।

'दुई देशका नागरिकबीच ढुंगा हानाहान हुँदा पनि प्रधानमन्त्री शेरबहादुर देउवा र सरकार चुइक्क नबोल्नु लज्जाजनक हो। दुई देशबीचको यति गम्भीर विषय प्रमुख जिल्ला अधिकारीले हेरेर हुने होइन । प्रधानमन्त्री र मन्त्रालय देशप्रति जिम्मेवाउ होऊ,' उनले सामाजिक सञ्जालमा लेखेका छन्।

सुदूरपश्चिमको दार्चुलाको खलंगास्थित भारतले महाकाली नदीको बीचमा तटबन्ध बनाएर धार परिवर्तन गर्दा केही दिनदेखि नेपाल र भारतका नागरिकबीच ढुंगा हानाहान हुँदैआएको छ।

आइतबार अपराह्न ४ बजेतिर दुवैतर्फबाट ढुंगा हानाहान भएको हुँदा भारतीय पक्षले प्रहार गरेको ढुंगा लागेर बांगाबगरस्थित कैलाशपति आधारभूत विद्यालय नजिक खेलिरहेका चार बालक घाइते भएका थिए।

नेपाली नागरिकले नदीको धार परिवर्तन गर्दा नेपालको भूमि मासिने भन्दै त्यसलाई रोक्न भारत सरकारसँग माग गर्दैआएका छन्।