परराष्ट्रलाई गृहले भन्यो- महाकाली घटना बारे भारतलाई कूटनीतिक नोट पठाउनु

काठमाडौं- महाकालीको बहाव नेपालतर्फ धकेलेर भारतले अनधिकृत पक्की संरचना बनाएको विषयमा गृह मन्त्रालयले भारतलाई कूटनीतिक नोट पठाउन आग्रह गर्दै परराष्ट्र मन्त्रालयलाई पत्र पठाएको छ।

गृहले सोमबार परराष्ट्रलाई पत्र पठाउँदै दार्चुला सदरमुकाम खलंगाको पारिपट्टी भारतले महाकाली मिच्दै एकतर्फी तटबन्धन बनाएको र त्यसबाट नदीको धार नेपालतर्फ धकेलिएको उल्लेख गर्दै भारतलाई यस विषयमा कुटनीतिक नोट पठाउन भनेको हो।

नेपालको सहमतिबिना संरचना बनाइएको र यसले नेपालतर्फ क्षति पुर्‍याउने गृहको पत्रमा उल्लेख छ। गृहले सीमा क्षेत्रमा संरचना निर्माण गर्नु परे दुवै देशको सहमति र समन्वय हुन पर्ने पत्रमा उल्लेख गरेको छ।

पटक-पटक सीमा क्षेत्रमा यस्ता घटना दोहोरिरहेकाले कूटनीतिक रूपमापहल गरी समस्याको दीर्घकालीन समाधान खोज्न गृहले परराष्ट्र मन्त्रालयसमक्ष आग्रह गरेको छ।

आइतबार अपराह्न ४ बजेतिर दुवैतर्फबाट ढुंगा हानाहान भएको हुँदा भारतीय पक्षले प्रहार गरेको ढुंगा लागेर बांगाबगरस्थित कैलाशपति आधारभूत विद्यालय नजिक खेलिरहेका चार बालक घाइते भएका थिए।