मतगणना भइरहेका तीनै क्षेत्रमा गठबन्धनका उम्मेदवारको अग्रता

काठमाडौं- प्रतिनिधिसभा सदस्य निर्वाचन २०७९ अन्तर्गत प्रत्यक्षतर्फ १६५ वटा निर्वाचन क्षेत्रमध्ये १६२ क्षेत्रको अन्तिम मतपरिणाम सार्वजनिक भइसकेको छ भने तीनवटा क्षेत्रमा गणना भइरहेको छ।

मतगणना जारी रहेका दोलखा, स्याङ्जा २ र बाजुरामा सत्तारुढ गठबन्धन दलका उम्मेदवारले अग्रता लिइरहेका छन्। विवादका कारण पुनः मतदान भएको दोलखा तथा मतगणना रोकिएका स्याङ्जा २ र बाजुरामा दुई दिनदेखि मतगणना जारी छ।

शुक्रबार साँझसम्म तीनै क्षेत्रमा सत्तारुढ गठबन्धन दलका उम्मेदवारले अग्रता बढाउँदै लगेका छन्। दोलखामा गठबन्धनबाट नेकपा माओवादी केन्द्रका उम्मेदवार गंगा कार्कीले पाँच हजार ४१६ मत पाएर अग्रस्थानमा छन्।

उनका निकटतम प्रतिस्पर्धी नेकपा एमालेका बालकृष्ण सिवाकोटीले ३ हजार ८८९ मत पाएका छन्। तेस्रो नम्बरमा रहेका राष्ट्रिय स्वतन्त्र पार्टीका उम्मेदवार जगदीश खरेलले १३५ मत पाएका छन्।

स्याङ्जा २ मा नेपाली कांग्रेसका उम्मेदवार धनराज गुरुङले दुई हजारभन्दा बढी मतको अग्रता बनाएका छन्। गुरुङले १६ हजार ५३८ मत पाएका छन् भने एमाले उम्मेदवार पद्मा अर्यालले १४ हजार २२३ मत पाएकी छन्। यहाँ पनि तेस्रो नम्बरमा रहेका स्वतन्त्र पार्टीका उम्मेदवार टिकराज गुरुङले ६ हजार १६४ मत पाएका छन्।

बाजुरामा कांग्रेसका उम्मेदवार बद्री पाण्डेले दुई हजारभन्दा बढी मतको अग्रता बनाएका छन्। पाण्डेले ६ हजार ५३५ मत पाएका छन् भने एमालेका कर्णबहादुर थापाले चार हजार ४२१ मत पाएका छन्। तेस्रो नम्बरमा रहेका राष्ट्रिय प्रजातन्त्र पार्टीका जंगकुमार गिरीले २२ मत पाएका छन्।