एकीकृत समाजवादीले सातै प्रदेशमा कटायो थ्रेसहोल्ड, केन्द्रमा संघर्षरत

काठमाडौं- माधवकुमार नेपाल नेतृत्वको नेकपा एकीकृत समाजवादी पार्टीले समानुपातिकतर्फ सातवटै प्रदेशमा थ्रेसहोल्ड कटाएको छ। प्रदेशमा १.५ प्रतिशत मत पाउँदा थ्रेसहोल्ड कट्ने व्वयस्था छ।

एकीकृत समाजवादीले कर्णालीमा ६ प्रतिशत मत पाएको छ भने सुदुरपश्चिममा ४.९८ प्रतिशत मत समानुपातिकतर्फ पाएको छ। सबैभन्दा कम गण्डकीमा उसले १.५९ प्रतिशतमात्र मत पाएको छ।

एकीकृत समाजवादीले लुम्बिनीमा २.२५ प्रतिशत मत पाएको छ भने बागमतीमा ३.४७ प्रतिशत, मधेस प्रदेशमा ५.५५ प्रतिशत र प्रदेश १ मा ३.०३ प्रतिशत मत समानुपातिकतर्फ पाएको छ।

संघीय संसद्‍मा भने यो नेकपा एस थ्रेसहोल्ड कटाउन संघर्षरत छ। समानुपातिकतर्फ उसले ३ प्रतिशतको थ्रेसहोल्ड कटायो भने राष्ट्रिय पार्टीको मान्यता पाउने छ र बढीमा ४ सिट सांसद थपिएर १४ सिटको दल बन्न पुग्नेछ। थ्रेसहोल्ड कटेन भने सत्ता गठबन्धनलाई ४ सिट घाटा लाग्ने छ। प्रतिनिधिसभामा एकीकृत समाजवादीले प्रत्यक्षतर्फ १० सिट जितेको छ।

बुधबार रातिसम्म उसले प्रतिनिधिसभामा समानुपातिकतर्फ २.८५ प्रतिशत मत पाएको छ। ३ प्रतिशत कटाउन अब उसलाई ०.१५ प्रतिशत मत आवश्यक छ। अब केही लाखमात्रै मत गन्न बाँकी छ।