पुनः मतगणनाको माग गर्दै सञ्चारमन्त्री कार्कीको निवेदन, गणना अवरुद्ध

काठमाडौं– हिजो शनिबारदेखि अवरुद्ध भएको सुनसरी क्षेत्र नम्बर ४ को मतगणना अझै सुरु हुन सकेको छैन। सञ्चार तथा सूचना प्रविधि मन्त्रीसमेत रहेका नेपाली कांग्रेसका उम्मेदवार ज्ञानेन्द्रबहादुर कार्कीले मतगणनाका क्रममा ६ सय मत एमालेतर्फ जोडेको आरोप लगाएपछि दुई दिनदेखि मतगणना रोकिएको हो।

विवाद उत्पन्न भएपछि शनिबार अपरान्ह सर्वदलीय बैठक बसेको थियो। बैठकमा कार्कीका कार्यकर्ता र एमालेका प्रतिनिधिहरुबीच विवाद भएपछि प्रहरीले गणनास्थलबाट केहीलाई बाहिर निकालेको थियो।

लोकतान्त्रिक–वाम गठबन्धनका तर्फबाट उम्मेदवार रहेका कांग्रेस नेता कार्कीले एमालेले मतगणनामा धाँधली गरेको आरोप लगाएका छन्। उनले आयोगकै मिलेमतोमा ६ सय ६ मत एमाले उम्मेदवारका पक्षमा जोडेको आरोप लगाउँदै आएका छन्।

काकीले पुनः मतगणना गर्न माग गर्दै निवेदन दिएका छन्। आज बिहान पनि मतगणना गराउने सन्दर्भममा सर्वदलीय बैठक बसेको थियो। तर कार्कीका प्रतिनिधिले पुनः मतगणना गर्नुपर्ने अडान लिएपछि अहिलेसम्म गणना स्थगित छ।

त्यहाँ कार्कीले २३ हजार चार सय ३९ मत प्राप्त गर्दा एमाले उम्मेदवार जगदीशप्रसाद कुसियैतले २३ हजार तीन सय ४१ मत पाएका छन्। कार्की कुसियतभन्दा ९८ मतमात्र अगाडि छन्। यस क्षेत्रमा ८१ हजार दुई सय ३३ मत खसेको छ।