पवनको अर्धशतकमा अफगानिस्तानलाई नेपालको १९० रनको लक्ष्य

काठमाडौं-भारतको लखनउमा जारी चौकोणीय यू-१९ एकदिवसीय क्रिकेट सिरिजको अन्तिम खेलमा नेपालले अफगानिस्तानलाई जितका लागि १९० रनको लक्ष्य दिएको छ । अफगानिस्तानले टस जितेर फिल्डिङ रोजेपछि ब्याटिङको निम्लो पाएको नेपालले ४९.३ ओभरमा अलआउट हुँदै १८९ रन बनाउन सक्यो ।

नेपालका लागि पवन शार्रफले अर्धशतकीय इनिङस खेले । उनले ९६ बलमा १० चौका र १ छक्कासहित अविजित ७८ रन जोडे । यस्तै सन्दीप जोराले २८ रन जोड्दा रसिद खानले २४ तथा लोकेश बमले १६ रन बनाए ।

अफगानिस्तानका लागि नविद मोहमद कविरले सर्बा्धिक ३ विकेट लिए । सिरिजको फाइनलमा पुग्न असफल दुवैको लागि यो खेल प्रतिष्ठाको लडाईको रुपमा रहने छ । यस खेलमा विजयी हुने टोलीले एक जितसहित घर फर्कने छन् । अघिल्ला दुई खेलमा लगातार हार बेहोरेको नेपाल र अफगानिस्तान पहिलो जितको खोजीमा रहेका छन् ।

सिरिजको पहिलो खेलमा नेपाल भारतको ‘बि’ टोलीसँग पराजित भएको थियो । त्यस्तै शुक्रबार भएको दोस्रो खेलमा नेपाल भारतको ‘ए’ टोलीसँग ८ विकेटले पराजित भएको थियो । यता अफगानिस्तान पहिलो खेलमा भारतको ‘ए’ टिम र दोस्रो खेलमा भारतको‘’बि’ टिमसँग पराजित भएको थियो ।

बंगलादेशमा आयोजना हुने एसिया कप क्रिकेटको तयारीको रुपमा  भारतीय क्रिकेट बोर्डले आयोजना गरेको सिरिजमा भारतको दुई गरी नेपाल र अफगानिस्तानका टोलीले प्रतिस्पर्धा गरिरहेका छन् । सिरिजको फाइनलमा भारतको ‘ए’ र ‘बि’ टोलीले खेल्नेछन् ।