आजको खेलमा रोनाल्डोले गोल गर्ने प्रशिक्षक एलेग्रीको भविष्यवाणी

टुरी (एजेन्सी)-यसै सिजन रियल मड्रिडबाट युभेन्ट्स पुगेका पोर्चुगिज सुपरस्टार खेलाडी क्रिस्टियानो रोनाल्डोले युभेन्ट्समा आफ्नो पहिलो गोल गर्ने प्रशिक्षक मासिमिलियनो एलेग्रीले भविष्यवाणी गरेका छन् । 

उनले आइतबार टुरिनमा हुने ससुओलोसँगको खेलमा रोनाल्डोले गोल गर्ने भविष्यवाणी गरेका हुन् । पाँच पटक विश्वका उत्कृष्ट खेलाडी बनेका रोनाल्डो जुलाई पछि युभेन्टसका लागि गोल गर्न सकेका छैनन् ।

‘आफ्नो पहिलो खेलमा रोनाल्डोले गोल पोस्टमा धेरै प्रहार गरे । तर उनले गोल पोस्टको जालि चुम्न सकेनन्,’ प्रशिक्षक एलेग्रीले भने । उनले थपे, ‘तर, उनले राम्रो गरि रहेका छन् र मलाई लाग्छ की रोनाल्डोले ससुआलोविरुद्धको खेलमा गोल गर्ने छन् ।’

जारी सिजनका तीन खेलमा शतप्रतिशत नतिजा निकाल्दा समेत रोनाल्डोले युभेन्ट्सका लागि आफ्नो पहिलो गोल गर्न सकेका छैनन् । पहिलो खेलमा युभेन्ट्सले चिएभोलाई ३-२ ले पराजित गर्दा, दोस्रो खेलमा लाजिओलाई २-० ले पराजित गरेका थियो । 

त्यस्तै आफ्नो तेस्रो खेलमा पर्मालाई २-१ को संघर्ष पुर्ण जित निकाल्दा समेत रोनाल्डोले गोल गर्न सकेन । तीन खेल खेलेको युभेन्ट्सको ९ अंक सहित पहिलो स्थानमा छ भने चार खेल खेलेको नेपोली तीन खेलमा जित र एक खेलमा हार सहित दोस्रो स्थानमा छ ।