विराटनगरमा तीन क्षेत्रको मतगणना सुरु

विराटनगर- आदर्श माद्यामिक विद्यालय विराटनगरमा तीन क्षेत्रको मतगणना सुरु भएको छ।

क्षेत्र नम्बर ४, ५ र ६ को प्रतिनिधिसभातर्फको मतगणना सुरु भएको मुख्य निर्वाचन अधिकृत दुर्गाप्रसाद ढुङ्गेलले जानकारी दिए। उनका अनुसार आदर्श माविको माथिल्लो तलामा क्षेत्र नम्बर ६, तल्लो तलामा क्षेत्र नम्बर ४ र आदर्शको इन्जिनियरिङ ब्लकमा क्षेत्र नम्बर ५ को प्रतिनिधिसभातर्फको मतगणना सुरु भएको हो। 

सोमबार विहान बसेको सर्वदलिय बैठकमा प्रतिनिधि सभा, प्रदेशसभा र समानुपातिकको एकै पटक मतगणना गर्ने सहमति भएको मुख्य निर्वाचन अधिकृत ढुङ्गेलले बताए। 

विराटनगर बाहिर क्षेत्र नम्बर १, २ र ३ को संवन्धित निर्वाचन क्षेत्रमा नै मतगणना हुँदैछ। १ नम्बर क्षेत्रको उर्लाबारी नगरपालिका, २ नम्बरको रतुवामाइको विश्वनाथ मन्दिर र ३ नम्बरको बेलबारीको भगवती माद्यामिक विद्यालयमा मतगणना सुरु हुँदैछ। 

मोरङ कुल ७ लाख ३५ हजार ५२५ मतदाता रहेकोमा आइतबार भएको प्रदेश तथा प्रतिनिधिसभा निर्वाचनमा ४ लाख ८७ हजार ४७ मत खसेको थियो।

दिउँसो १ बजेदेखि मतगणना सुरु हुने जानकारी पाएका उम्मेदवारका समर्थक शुभेच्छुकहरूको अहिले आदर्श मावि परिसर बाहिर उल्लेख्य भीड लागेको छ।