काठमाडौं-१ र ४ मा राति १० बजेदेखि मतगणना थाल्ने तयारी

काठमाडौं- काठमाडौंको निर्वाचन क्षेत्र नम्बर १ र ४ मा आइतबारै राति १० बजेदेखि मतगणना गर्ने तयारी गरिएको छ। मुख्य निर्वाचन अधिकृत राजकुमार खतिवडाले यी दुई क्षेत्रबाट मतगणना थाल्ने सहमति भएको जानकारी दिए।

यी दुई क्षेत्रका सबै मतदानस्थलबाट मतपेटिका संकलन भएको र सर्वदलीय बैठकबाटसमेत सहमति जुटेको उनको भनाइ छ। 

प्रमुख निर्वाचन आयुक्त दिनेशकुमार थपलियाले एक क्षेत्रको कम्तीमा चार टोलीले गणना गर्ने जानकारी यसअघि नै दिइसकेका छन्। प्रतिनिधि सभा प्रत्यक्ष र समानुपातिक तथा प्रदेशसभाका पनि प्रत्यक्ष र समानुपातिकको मतपेटिका छुट्टाछुट्टै कायम गरिएकाले चार स्थानमा गणना गर्दा देशभरको गणना चाँडो हुने उनको भनाइ छ। आयोगकै निर्देशन अनुसार गणना गर्ने तयारी छ। 

काठमाडौं–१ को मतगणना संघीय संसद् भवन रहेको अन्तराष्ट्रिय सम्मेलन केन्द्रमा गरिने छ। काठमाडौं–४ को गणना बुढानीलकण्ठस्थित जेष्ठ नागरिक आश्रममा हुनेछ।

काठमाडौंका अन्य क्षेत्रको मतपेटिका संकलन सकिएको र सर्वदलीय बैठक चलिरहेकाले त्यसले गर्ने निर्णयका आधारमा मतगणना हुनेछ। काठमाडौं–३ मा भने सोमबार बिहानबाट मतगणना थाल्ने सहमति छ।