मतपेटिका जलेपछि देवचुलीमा भोलि फेरि मतदान

पूर्वी नवलपरासी- पूर्वी नवलपरासीको देवेचुली नगरपालिका–४ स्थित शान्ति सृजना आधारभूत विद्यालय मतदान केन्द्रको मतपेटिका जलाएका कारण रद्द गरिएको निर्वाचन भोलि हुने भएको छ। मुख्य निर्वाचन अधिकृत उमेशप्रसाद लुइँटेलले आइतबार स्थगित भएको उक्त वडामा भोलि बिहान ७ देखि साँझ ५ बजेसम्म मतदान हुने जानकारी दिए।

स्थानीय नारायण भण्डारीले समानुपातिक मतपेटिका जलाएपछि त्यहाँ पुनः निर्वाचन हुने भएको हो। त्यहाँका निर्वाचन अधिकृत माधवराज गौतमले निर्वाचन रद्द गरिएको प्रतिवेदन जिल्ला निर्वाचन अधिकृतलाई बुझाइएको जानकारी दिए। 

गौतमका अनुसार स्थानीय नारायण भण्डारीले प्रदेश समानुपातिकतर्फको मतपेटिका जलाएका थिए। अन्य तीनवटा मतपेटिकामा मत खसालेपछि भण्डारीले अन्तिम मतपेटिकामा बडिलोसन (शरीरमा दल्ने औषधी) हालेर आगजनी गरेका हुन्। 

९८० मतदाता रहेको यस निर्वाचन केन्द्रमा सात सय मत खसेको थियो छ। आगजनी गरेपछि भण्डारी भागेका थिए। उनलाई करिब दुई किलोमिटर टाढा पुगेर प्रहरीले पक्राउ गरेको प्रमुख जिल्ला अधिकारी सुमन घिमिरेले जानकारी दिए।