कञ्चनपुरबाट नेकपा बहुमतका ८ जना पक्राउ

कञ्चनपुर- कञ्चनपुरबाट नेकपा बहुमतका आठ जनालाई प्रहरीले नियन्त्रणमा लिएको छ। भीमदत्त नगरपालिका- ४ भृकुटी मावि मतदान केन्द्रबाहिर निर्वाचन विरोधी गतिविधि गरेको भन्दै प्रहरीले जिल्ला इन्चार्ज हरिष दयाललगायतलाई आइतबार बिहान नियन्त्रणमा लिएको हो ।

बिहान करिब साढे ९ बजे दयाल नेतृत्वको समूहले मतदान स्थल बाहिर पर्चा पम्प्लेट देखाएर चुनावको विरोध जनाएको थियो।

वडा प्रहरी कार्यालय महेन्द्रनगरबाट प्रहरी निरीक्षक प्रकाश सिंह भण्डारीको कमाण्डमा रहेको टोलीले कञ्चनपुरको बेदकोट नगरपालिका- ७ गाउजीका ४२ वर्षीय हरिष दयाल, भिमदत्त नगरपालिका ९ मटेनाका २४ वर्षीय दीपेन्द्र ऐरी, वडा नम्बर १ बाराकुण्डाका ३० वर्षीय सुरेन्द्र धानुक र वडा नम्बर ८ तिलाचौरका २१ वर्षीय विरेन्द्र नाथलाई पक्राउ गरेको हो।

यसैगरी भीमदत्त नगरपालिका २ उल्टाखामका २४ वर्षीय सुरज मल्ल, भिमदत्त नगरपालिका ९ मटेनाका २१ वर्षीय सुरेश नाथ ,वडा नम्बर १८ कटानका ३० वर्षीय वीरेन्द्र शाह र शुक्लाफाँटा नगरपालिका-८ मणिकाधामका ४० वर्षीय नक्साल विष्टलाई पनि नियन्त्रणमा लिइएको प्रहरीले जनाएको छ।