देशभर साढे ४ लाख अस्थायी मतदाता, १४१ मतदान केन्द्र

काठमाडौं- आइतबार हुने प्रतिनिधिसभा र प्रदेशसभा सदस्य निर्वाचनमा पहिलो पटक कारागारमा रहेका कैदीबन्दीले मताधिकारको प्रयोग गर्ने भएका छन्। ४ लाख ५० हजार 'अस्थायी मतदाता'ले मतदान गर्न पाउने भएको र यसका लागि १४१ मतदान केन्द्र निर्धारण गरिएको निर्वाचन आयोगले जानकारी दिएको छ। 

मतदाता नामावलीमा नाम समावेश भएपनि मतदान केन्द्रमा नखटिने कर्मचारी, सुरक्षाकर्मी, वृद्धाश्रममा रहेका व्यक्ति, निर्वाचन कसुरमा सजाय पाएका व्यक्तिले भने मतदान गर्न पाउँदैनन्। 

आयोगले २०७२ सालमा जारी भएको नेपालको संविधानपछि अस्थायी मतदाताले मतदान गर्ने व्यवस्था पहिलो पटक कार्यान्वयनमा ल्याएको थियो। 

यसैबीच, काठमाडौँ उपत्यकालगायतका देशका सबै अस्थायी मतदाता केन्द्रमा समेत तयारी पूरा भएको छ। उपत्यकाका तीन कारागारमा निर्वाचनको सम्पूर्ण तयारी पूरा भएको सम्बन्धित कार्यालयले जनाएका छन्। काठमाडौँका दुई र ललितपुरका एक कारागारमा रहेका कैदीबन्दीमध्ये १८२ जनाले मतदान गर्न पाउनेछन्। 

कारागार कार्यालय काठमाडौँमा एक सय १० र जगन्नाथदेवलमा २० तथा कारागार कार्यालय ललितपुर ५२ कैदीबन्दीले मतदान गर्नेछन्। कारागार कार्यालय जगन्नाथलेवलमा तीन हजार चार सय, कारागार कार्यालय काठमाडौँमा छ सय ५० र कारागार कार्यालय ललितपुरमा एक हजार चार सय २० भन्दा बढी कैदीबन्दी छन्। 

कारागार कार्यालय जगन्नाथदेवलमा निर्वाचनको सम्पूर्ण तयारी पूरा भएको कार्यालयका उपसचिव वेदप्रसाद खरेलले जानकारी दिए। उनले निर्वाचन अधिकृतको कार्यालयबाट मतदान सामग्री बुझेर ल्याइएको बताए। आइतबार बिहान ७ बजेदेखि मतदान सुरु हुनेछ।