निर्वाचन आयोग घेर्न पुगेका ७ जना पक्राउ

काठमाडौं- मोहन वैद्य किरण नेतृत्वको नेकपा (क्रान्तिकारी माओवादी) निकट कार्यकर्ताहरू निर्वाचन आयोग घेर्न पुगेपछि प्रहरीले सात जनालाई पक्राउ गरेको छ। 

आज चुनाव बहिष्कारको माग राख्दै बहादुर भवनस्थित निर्वाचन आयोग अगाडि प्रदर्शन  गर्न पुगेका सात जनालाई प्रहरीले पक्राउ गरेको हो। उनीहरू पक्राउ गरी प्रहरी वृत दरबारमार्ग लगिएको प्रहरीले जनाएको छ।

आगामी ४ मंसिरको निर्वाचन बहिष्कार गर्ने भन्दै वैद्य नेतृत्वको नेकपा क्रान्तिकारी माणवादी आन्दोलित छ। 

निर्वाचन स्वच्छ, निष्पक्ष तथा धाँधलीरहित नभई वर्तमान राज्यसत्ता तथा व्यवस्थाका प्रतिनिधिहरूद्वारा फासीवादी ढंगले प्रस्तुत हुने देखिएको क्रान्तिकारी माओवादीको ठहर छ। 

राष्ट्रियता, जनतन्त्र तथा जनजीविकाका समस्याहरूको वास्तविक समाधान गर्न नयाँ जनवादी राज्यसत्ताको स्थापना गरी वैज्ञानिक समाजवादको दिशामा अगाडि बढ्नुपर्नेमा वैद्य नेतृत्वको माओवादीले जोड दिँदै आएको छ।